Editoryal: Tungod sa kalangay

Editoryal: Tungod sa kalangay
Editorial Cartoon by Ariel Itumay

Bisan unsang butang o lihok nga la­ngay, momugna og problema. Alkanse. Hinuon, pwede masolusyonan lakip sa pagkonsiderar sa paghunong sa proyekto.

Kini sama sa konsepto sa cut o stop loss, estratehiya sa pagsanta sa posible nga dugang pagkaalkanse.

Usa niini ang papangita og exit point sa proyekto aron moabante. Ang nabiling salapi o budget, magamit pa sa laing diskarte.

Apan sayon kini sultihon, lisod ipatuman labina sa usa ka proyekto nga daghang mohukom sama sa Cebu Bus Rapid Transit (CBRT) project, nangalisbo usab ang bulok sa pulitika.

Kahinumdoman, langay nang daan ang pagsugod sa maong proyeko sud sa dul-an sa napulo ka tuig. Ug dihang gisugdan ang unang hugna sa proyekto, mahuman unta kini sa miaging buwan apan layo pa sa tinuod hangtod karon.

Si Cebu City Councilor Rey Gealon, chairperson sa Traffic Management and Coordination Committee (TMCC), niduso og resolusyon nga giaprobahan sa Konseho atol sa ilang regular session niadtong Miyerkules, Enero 31, 2024, nga nag-awhag sa Department of Transportation (DOTr) nga paspasan ang paghuman sa BRT.

Matod ni Gealon, kaminusan ang kahasol ug epekto niini sa publiko nga moagi sa karsada nga unang gianunsyo sa DOTr nga mahuman sa katapusang quarter sa 2023, apan kini giuswag sa 2025. Ning ulahi, giuswag na usab sa 2027.

Tungod sa iyang kalangay, ang BRT nga proyekto sa dakbayan sa Sugbo unang nagkantidad og P16 bilyunes apan karon halos doble na ang kantidad ngadto sa P28.78 bilyunes.

Bisan ang World Bank, usa sa mga langyaw nga banko nga gikuha ang labing dakong pahat sa utang sa BRT, nipadayag sa ‘pag-restructure’ sa utang tungod sa ilang gitumbok nga kala­ngay sa proyekto.

Maayo nga nitanyag ang World Bank og pag-restructure sa utang, apan nasayod ka ba nga dunay dakong disbentaha ang pag-restructure sa utang?

Sa taas nga kalangay ug sa kadaghan nang kausaban sa dakbayan sa dagan sa panahon, haom pa ba kaha ang BRT sa iyang tumong?

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph