Ang bag-ohay lang nga makapasubo nga insidente sa Budlaan Falls diin usa ka hiker ang namatay, nagsilbing usa ka lig-ong pahinumdom sa mga risgo nga kauban sa mga outdoor activity ilabi na sa dili matag-an nga palibot sa kabukiran.
Si Konsehal Dave Tumulak sa Cebu City dali nga nisanong niining dili maayong panghitabo pinaagi sa pag-file og draft ordinance nga nagmando sa mga protocol sa kaluwasan alang sa outdoor activities sa kabukiran sa siyudad ug sa mga trekking zone.
Importante kining maong lakang aron mapanalipdan ang mga residente ug mga turista nga nangita og adventure sa matahum nga kabukiran.
Ang nagkalainlaing terrain sa Sugbo nagtanyag og daghang kahigayonan alang sa trekking, waterfall exploration, mountain biking, ATV riding, ug cave exploration.
Kining mga kalihukan importante alang sa lokal nga turismo.
Apan sama sa nahitabo nga trahedya sa Budlaan Falls, bisan ang mga batid nga adventurer mahimong malit-ag sa kalit nga pagbag-o sa panahon.
Usa sa labing importante nga aspeto niining draft ordinance mao ang mandatory registration sa tanang indibiduwal ug grupo ngadto sa barangay diin sila mag-trekking og hiking.
Kining maong lakang magtugot sa mga lokal nga awtoridad sa pagsubay kung kinsa ang anaa sa ilang hurisdiksyon nga makapadali sa pagluwas kon gikinahanglan.
Ang mga partisipante moagi una og pre-activity weather assessments gamit ang mga tinubdan sama sa DOST-Pagasa aron mahibaloan ang posibleng mga kapeligrohan sa dili pa sila magsugod sa ilang panaw.
Gawas pa, moagi sab sila og safety briefings ug kinahanglan silang magsul-ob og safety gear sama sa trekking shoes, life vests, ug helmets.
Kini ang batakang mga pag-amping sa kaluwasan nga sa kasubo, kanunay nga gikalimtan o giisip nga dili kinahanglanon sa mga indibiduwal nga naghinamhinam sa pagbuhat sa ilang adventure.
Ang Barangay Enforcement and Monitoring Teams (BEMT) maoy gitahasan sa pagpatuman niining maong mga protocol.
Ang mga silot niadtong dili motuman sa lagda pamultahon og P1,500 alang sa una nga paglapas.
Niadtong mga nagbalikbalik nga nakasala, pahamtangan sila og mas daku nga multa, pagkabilanggo, ug pagbakwi sa ilang permit ug lisensiya.
Sa katapusan, kining gisugyot nga ordinansa usa ka lakang sa saktong direksyon alang sa Cebu City.