Editoryal: Unsay buhaton kon magduka mag-drive

Editoryal: Unsay buhaton kon magduka mag-drive
Editorial Cartoon by Ariel Itumay

Sa Lunes sa buntag, Disyembre 4, unom ka mga tawo ang nangaangol human madasmagi sa usa ka sports utility vehicle (SUV) ang usa ka multicab nga gisakyan sa usa ka magtiayon ug laing upat ka mga babaye nga diha daplin sa karsada sa Maracas, Lahug, dakbayan sa Sugbo.

Kinahanglan pang lugiton sa mga rescue personnel ang driver sa multicab nga napiit.

Ang driver sa SUV nga usa ka call center agent gihulagway sa polis sa traffic section nga nag-imbestigar nga nakatulog samtang nagmaneho kay hayan gikan pa sa pang gabii nga duty.

Ikaduha kining nahitabo sa Cebu City kay niadtong hinapos sa Oktubre, gidaro usab sa usa ka sakyanan ang mga kandidato sa barangay elections sa Talamban nga naglakaw lang daplin sa karsada sayo sa buntag.

Ang paghikatulog, sama sa kahubog samtang nagmaneho, usa sa mga hinungdan sa mga aksidente sa kadalanan sa Sugbo.

Busa, angay mahinumdoman nga kon magduka, ayaw pag-drive. Kon abton o magsugod na gani ang pagduka, ayaw ipugos ang pagmaneho. Pangita og dapit nga mahimo kang motagpilaw aron malikayan ang disgrasya.

Kon naa ka sa call center nagtrabaho, matulog una sa gitagana nga sleeping quarters aron presko ang pag-uli. Di usab maghapithapit kay hayan mobalik na sab ang duka sa pag-uli. Mas maayo nga modiretso sa gipuy-an.

Kanunay huna-hunaon nga ang pagmaneho nga kuwang sa kaalerto kuyaw di lang sa kaugalingon sa driver, kon di sa mga tawo ug kabtangan nga naa sa karsada. Namatud-an na kini sa daghang mga kaso sa mga aksidente sa sakyanan sa kadalanan, kansang mga driver nakatagpilaw.

Kon di ka man gani makapugong sa duka, ayaw pagdala og sakyanan sa pagtrabaho, pag-commute kun sakay og publiko’ng sakyanan kay mahimo ra kang matulog padulong mopauli gikan sa duty sa gabii.

Di man gani, maghimo og arrangement sa parking management nga ibilin ang sakyanan kon magduka sa tingpauli na.

Mga panagana ni aron malikayan ang aksidente.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph