Editoryal: Unsay motibo sa pagsangpit, bugalbugal o pagtahod?

Gisaway og maayo sa netizens ang gibuhat sa usa ka sakop sa LGBTQ community nga giingon nga nipabarog og duha ka mga oras sa usa ka kawani sa kan-anan sa usa sa mall sa Dakbayan sa Sugbo.

Sa iyang social media post nga iyang gitangtang na human nisamot ang pagsaway sa netizens kaniya, si Jude Bacalso nipasabot sa kinatibuk-ang hitabo. Iya kadtong kaugalingon nga bersyon. Bisan gani netizens nga sakop sa ilang sektor, wa nakauyon sa iyang gibuhat.

Kon nasakitan si Jude sa wa pagtawag kaniya og Maam, inay gisangpit siya og Sir, masabot ang iyang gibati. Sensitibo siya sa mao nga butang, sama sab sa ubang LGBQT members. Apan igo ba kini nga magbarog, kon tinuod man, og pipila ka oras ang usa ka kawani tungod niini? Nihimakak man hinuon si Jude nga iyang gisugo sa pagbarog, apan kon sakto ang gisulti sa netizen nga ni-post sa hitabo, di gihapon maayo kay mahimo ra niyang sultihan nga okay na human niya nasultihan. 

Usa pa, unsay tuyo sa kawani sa pagtawag kaniya og ‘Sir’? Bugalbugal ba o pagtahod? Kon nakaila niya ang kawani kay higala diay sila ni Jude, nasayod ang lalaki unsa siya sa una. Mao to tingali gitawag siya og Sir, agi og pagtahod, di aron pagbugalbugal kaniya.

Igo na unta kaayo nga iyang gisultihan, gipasabot ang kawani. Mahimo ra gani unta nga iyang gisekreto pag-estorya, wa atubangan sa mga kauban, kinsa klaro sab nga nasakitan sa nahitabo sa ilang kauban.

Ang tan-aw sa netizens, apil na ang ubang mga sakop sa LGBTQ community, nag power tripping siya. Di malikayan ang mao nga perception. Nisamot ang kasuko sa netizens sa iyang social media post. Sa iyang post, ingon sa wala siya nagbasol sa iyang gibuhat.

Sa mao nga hitabo, gihuna-huna unta og maayo niya kon unsa ang intensyon sa nagsangpit niya. Bugalbugal o pagtahod apan nasayop lang sa pagsangpit. Kon siya nasakitan, iya ra unta nga gisultihan ang mao nga kawani ug gipasabot kalabot sa hustong pamatasan, inay. Mao na ang nasakitan ug nasuk-an sa netizens.

Usa sab ka pulong ang angay unta nga giluwatan ni Jude. Kini mao ang sorry. Tinuod nainsulto siya, apan ang iyang gibuhat sa habig sa kawani nasobraan ra sab. 

Maayo kay kagabii, sa iyang post, nangayo na siya og sorry sa hitabo ug gihilot ang tanan tali sa mga tag-iya sa kan-anan.

Hinaot pa nga ang matag habig dunay nakat-unan nga leksyon. Huna-hunaon una og maayo ang buhaton aron malikayan ang di maayo nga linugdangan.