Editoryal: Valentine’s Day sa tanan

Editoryal: Valentine’s Day sa tanan
Editorial Cartoon by Ariel itumay

Karon nga adlaw sa gugma, Pebrero 14, o mas nailang Valentine’s Day. Apan dili lang kini adlaw alang sa mga manag-uyab ug magtiayon, para sa tanan labina sa pamilya.

Ngano? Ang gugma usa ka mithi nga nagtagos sa tanang aspeto sa kinabuhi. Usa ka sentro sa pagbati ug pagpadayag sa pagkatawo.

Kini nga mithi importante nga ipatigbabaw matag adlaw, apan tungod sa tradisyon, dunay espisyal nga gitagana alang sa Adlaw sa Gugma.

Ug kini gilambigit sa adlaw sa martir nga Kristiyano nga si Saint Valentine, kinsa gilutos panahon sa Roman Empire sa 3rd century.

Subay sa kasaysayan, napriso si Valentine tungod sa pagpahigayon sa seremonyas sa Kristiyano nga kasal labina sa mga sundalo.

Gawas nga paglutos sa pagtuo nga Kristiyanismo, mando usab sa emperador sa maong panahon nga gidili ang pagminyo sa sundalo ug giisip nga dakong sala.

Dihang nabilanggo, dakong milagro ang nahimo ni Valentine dihang iyang giayo ang buta nga anak nga babaye sa opisyal sa bilanggoan.

Ug bespiras sa iyang kamatayon, ang maong babaye nipalusot og suwat sa bilanggoan sa pagpasalamat ug gilagdaan og ‘Your Valentine.’

Ang maong estorya napasa-pasa sa mga henerasyon hangtod ning modernong panahon. Nahimo’ng inspirasyon sa dakong selebrasyon sa gugma.

Bisan sa kakaraan sa kasaulogan, ang Valentine’s Day nagpabiling lab-as ug alegre. Ang mga buwak, labina sa rosas, himalitan bisan momahal kini ning panahuna.

Ang buwak materyal nga simbolo ug pagpadayag sa kahumot ug katam-is sa gugma labina kon patabanan kini og chocolate.

Sa gikaingon, karon dili lang limitado sa manag-uyab o buot panguyaban ug magtiayon, para kini sa tanan nga imong gimahal.

Dili maguol nga maapil sa ‘firing squad’ kay way uyab o karelasyon. Mas undanon nga hatagan og oras ug espisyal nga atensiyon ang pamilya nga makauban ning adlawa.

Happy Valentine’s Day!

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph