Editoryal: Wa paghatag og discount sa seniors

File Photo
File Photoeditoryal-default

Ang kulumunista sa Superbalita Cebu nga si Manny Rabacal nangulo karon sa pagpasaka og reklamo batok sa usa ka kompaniya nga matod niya wa mohatag og diskwento kaniya ug sa iyang kaubanan nga senior citizens.

Kon tinuod nga gisultihan siya nga wa pa malakip sa ilahang kompaniya ang produkto alang sa paghatag og discount sa senior citizens, sayop kaayo ni.

Ang paghatag og discount sa senior citizens nalatid sa balaod. Nalatid sa Republic Act 9994 kun Expanded Senior Citizens Act of 2010 nga ang tanang mga lumolupyo sa nasod nga nag-edad og 60 anyos pataas, hatagan og 20 porsyento nga diskwento sa tanang mga palaliton.

Gawas sa 20 porsyento nga diskwento, exempted sab sila sa 12 porsyento nga expanded value added tax (E-VAT). Sa ato pa, kada palaliton o item, naa silay 32 porsyento nga diskwento.

Apan makapahimangod kaayo kay dunay mga establismento nga di manghatag og discount kanila. Sama sa usa ka chain sa pharmacy nga di moha­tag og discount kay ang ila kuno nga presyo discounted na. Kon mopalit ka og tambal, senior citizen ka man o di, pareho ra og presyo kay discounted na kuno daan ang ilang mga baligya. Klaro kaayo nga lipatlipat. Magkapareho diay og presyo ang senior ug di senior?

Maayo kaayo nga nangulo si Rabacal ning kawsa alang sa mga senior citizen kay sa pagkatinuod lang, daghan sa mga establisemento ang mapahimudsanon kaayo. Wa sila nagtuman sa balaod. Sama anang nanghatag og discount kay promo kuno, di sila mohatag og discount sa senior citizens.

Matod sa Senado, di na mao. Kinahanglan nga gawas sa promo, duna gihapoy discount ang senior citizens niana kay ang balaod, wa maghisgot og exemption sa mga kompaniya nga naghatag og discount. Mao na nga dunay senior citizens nga nangreklamo ug ubang mga kompaniya nga gireklamo gipangkasab-an sa mga magbabalaud kay minaldito ang ilang katarungan sa paglusot sa balaod.

Di baya mahimo nga ang senior citizen ug di senior magpareho og bayran sa usa ka produkto tungod lang kay dunay promo o discounted na. Discounted o wala, gikinahanglan hatagan og discount ang senior citizen. Gawas sa 20 porsyento, exempted sab sa E-vat. Nagpasabot, 32 porsyento ang diskwento.

Apan lipatlipat sab ang gigamit sa daghang mga establisemento. Kay kanang 20 porsyento mao ray gihatag, wa ang 12 porsyento nga E-vat.

Hinaot pa nga ning gibuhat nila ni Rabacal, mapugos na ang mga negusyo sa pagtuman sa balaod alang sa senior ci­tizens.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph