Nag-atang ang tibuok kalibotan karon kon si kinsa ang sunod nga mapiling Santo Papa isip hulip sa nitaliwan nga si Pope Francis.
Si Pope Francis namatay niadtong Easter Monday, Abril 21, 2025, sa edad nga 88 tungod sa heart failure.
Niadtong Miyerkules, Mayo 7, nibul-og ang itom nga aso gikan sa panghaw sa Sistine Chapel nga nagpasabot nga wala pay napili nga papa.
Gisalmotan sa 133 ka mga cardinals gikan sa 70 ka nasod ang conclave alang sa pagpili sa ika-267 nga lider sa Simbahang Katoliko.
Lakip sa nisalmot sa maong kalihukan nga gisugdan sa Santos nga Misa ang tulo ka Filipino cardinals – Luis Antonio Tagle, Jose Advincula ug Pablo Virgilio David.
Human mapakyas sa pagpangita og mananaog sa unang balota, mipahuway ang mga cardinal pagkagabii ug mibalik sa Sistine Chapel pagka-Huwebes sa buntag aron ipadayon ang pagpangita sa mopuli ni Pope Francis.
Sa gawas sa St. Peter's Square, daghan’g mga tawo nga nag-atang kon aduna na bay napili nga bag-ong Santo Papa pinaagi sa pagbantay sa aso nga mogawas sa panghaw sa Vatican.
Ang puti nga aso nga mogawas gikan sa panghaw nagpasabot nga aduna nay bag-ong papa nga napili ug nakadawat og igong boto atol sa Papal Conclave.
Aron mahimong papa, gikinahanglan sa usa ka cardinal ang 2/3 o 89 ka boto gikan sa 133 ka kwalipikado nga mga kardinal.
Dili dali ang pagpili og bag-ong papa, sanglit pagatun-an pa kini og maayo sa mga cardinal kon si kinsa kanila ang angayan og takus nga modumala sa Simbahang Katoliko sa tibuok kalibutan.
Sama niadtong pagpili ni Pope Francis nga naila sa ngalan nga Cardinal Jorge Mario Bergoglio sa Buenos Aires, Argentina, naabot pa sa ikalimang round ang botohan.
Human niadto, gi-install si Cardinal Bergoglio isip Santo Papa sa Abril 7, 2013.
Sulod sa 12 ka tuig niyang pagserbisyo, usa sa labing mahinungdanon niyang nahimo mao ang iyang paningkamot nga mamoderno ang pagdumala sa Simbahan. Iyang gi-overhaul ang pinansyal nga mga operasyon sa Vatican aron mapalambo ang transparency ug accountability, pagsulbad sa dugay na nga mga isyu sa korapsyon, ingon man ang paghimo sa Simbahan nga mas inklusibo, labi na ang pagdawat sa LGBTQ+ community.