Dayag ang rason kon nganong nakadesisyon si Cebu Governor Pamela Baricuatro nga inaton og dugang 45 ka mga adlaw ang pag-ban sa buhing mga baboy, karne sa baboy, ug mga produkto nga ginama sa baboy gikan sa Negros Island ug uban pang mga lugar nga apektado sa African Swine Fever –proteksyunan ang binuhing mga baboy sa probinsya.
Sakto kining gibuhat ni Baricuatro gumikan kay ning puntoha, anaa pa ang hulga ning maong makalilisang nga sakit sa baboy.
Gimanduan ni Baricuatro ang Provincial Veterinary Office (PVO), law enforcement agencies, port authorities, tanang local government units nga mas pahugtan ang inspeksyon sa airports, mga pier, roll-on/roll-off facilities, ug pribadong landing area.
Dili man tuod direktang makatakod ug makaapekto ang ASF sa mga tawo mismo apan usa kini ka dakong hulga sa populasyon sa mga baboy sa Sugbo.
Kini nga sakit paspas nga motakod sa mga baboy ug kon dili mapugngan, delikadong mahurot ang mga baboy sa Sugbo ug kon mao kini ang mahitabo, apektado ang ekonomiya ug labaw sa tanan, kaluoy pud sa mga nagbuhi og mga baboy sa Sugbo.
Ang walay regulasyon o ilegal nga kalihukan sa nataptan nga mga produkto sa baboy magmugna og usa ka senaryo diin ang ubos nga kalidad, adunay sakit, o walay saktong inspeksyon nga karne daling makalusot sa mga lokal nga merkado.
Ning maong lakang ni Baricuatro, ang Kagamhanan sa Probinsya sa Sugbo epektibong nakahatag og proteksyon sa populasyon sa baboy sa Sugbo ug hasta sab sa kahimsog sa publiko.
Ning 45 ka mga adlaw nga lugway ubos sa Executive Order (EO) 44, nga gipirmahan ni Baricuatro, hinaot nga wala’y mogimaw nga mga mapahimuslanon nga kalit dayon mopasaka og taas sa presyo sa karne o produkto gikan sa baboy sa rason nga nagkuwang ang supply niini bisan wala’y kamatuoran.
Usa sab kini sa angayang bantayan sa gobiyerno, ang mga kalihukan nga sama niini.