Editoryal: Warning sa mga politiko

EDITORYAL
EDITORYAL

Sa paglingkod sa katungdanan ni Acting Mayor Raymond Alvin Garcia, iya dayon nga gimando ang pag-imbestigar sa giingong paghasi nga nasinati sa upat ka mga kawani nga ningpasaka og mga reklamo batok sa upat ka mga opisyal sa Dakbayan sa Sugbo.

Nag-viral gani ang usa ka video nga gi-upload sa social media diin ang usa sa mga kawani gikomprontasi sa usa ka opisyal sa City Hall. Iyang gikwestyon kon nganong giapil si suspended Mayor Michael Rama sa reklamo. Klaro nga ang uploader sa video ang usa sa upat ka mga kawani.

Nitubag ang kawani nga wa nila gipasanginlan si Rama. Apan bisan unsaon pa pagbaliktad, isip mayor, duna siyay command responsibility. Kon iya lang gipiyungan ang hitabo, diin mga opisyal ang giakusahan, natural nga manubag ang mayor. Di siya makapanghunaw sa iyang responsibilidad.

Imposible sab nga wa ni niabot sa iyang opisina ang hitabo kay hapit gud mag-usa ka tuig nga wa masuweldohi ning upat ka mga kawani. Napulo ka buwan nga way sweldo ang upat ka mga kawani. Di baya lalim nga mag-antos ka og 10 ka buwan nga way sweldo.

Karon nga niuyon na ang Konseho sa paggahin og P1 million alang sa sweldo sa upat, makaginhawa na sila. Tan-awon nato matuman ba ang deadline nga gitakda ni Garcia sa pagsweldo sa upat.

Di angay kasuk-an o tamayon ang upat ka mga kawani kay sila ang nagpakita og ehemplo nga di sayon nga tangtangon ug ibalhin ang kawani nga dunay regular nga item. Naa silay proteksyon ubos sa Civil Service Law nga naklaro nga nalapas sa City Hall dihang gibalhin ang upat.

Warning na ni sa mga politiko ug mga tawo sa mga politiko nga di magpasagad sa pagpatuman kon unsay ilang gusto sa way pagtan-aw sa balaod nga mao untay ilang ipatigbabaw ug panalipdan.

Hayan daghan ang nangalipay aning gibuhat sa upat kay di lang kini magamit sa mga kawani sa Cebu City Hall, magamit kini sa tanang mga kawani sa kagamhanan nga regular na ang position. Warning ni sa mga politiko nga di magpatuyang sa paggamit sa ilang gahom. Bisan gani ang ilang mga tinudlo nga langaw magtuo nga sama sa ilang amo, sila kabaw na sab.

Pait ra ba ning sitwasyon sa mga local government unit (LGU) kay di sila magtan-aw sa kapabilidad ug kapasidad sa usa ka tawo, kon di unsay natampo ug matampo niini sa ilang politikanhong mga katuyoan ug tumong. In short, mas gamit ba ni sa iyang pamolitika. Mao na daghan sa mga LGU nagkagidlay lang ang trabaho.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph