Editoryal: Way karsada’ng bag-o, daghang sakyanang bag-o

Editoryal: Way karsada’ng bag-o, daghang sakyanang bag-o
Editoryal

Paspas kaayo ang paglambo sa dakbayan sa Sugbo sa nanglabay nga 10 ka mga tuig. Maora’g uhong nga nanurok ang tag-as mga building. Nagpadayon kini hangtod karon.

Sa ekonomikanhong kalambuan, mouban usab ang pag-umento sa katawhan ug pagdagsang sa mga tawo sa halayong dapit aron manimpalad sa siyudad nga daghan og ikatanyag nga trabaho.

Uban sa paglambo sa ekonomiya mao usab ang gahom ug kapabilidad sa tawo sa pagpamalit, sama sa mga sakyanan. Tungod sa kompetisyon, gipaubsan sab sa car dealers ang ilang mga downpayment nga naghimo nga masarang ang pagpalit, wa pay labot sa barato nga second hand nga mga sakyanan.

Taliwa ning nagkadaghan nga mga sakyanan sa karsada, way bag-o nga gibuksan nga mga dalan. Ang umaabot naa pa sa drawing. Sama sa karsada nga magdugtong sa South Road Properties sa Brgy. Guadalupe ug Lahug.

Mao ni ang dako nga problema nga giatubang sa traffic bodies sa Metro Cebu. Timailhan sa dako nga suliran mao ang kadaghan gihapon sa mga sakyanan bisan sa weekend, Sabado ug Dominggo. Bisan lawom nang gabii, daghan gihapon ang mga sakyanan sa kadalanan. Nagpasabot nga daghan na ang mga sakyanan nga nanagan sa mga karsada itandi sa nanglabay nga katuigan.

Busa, waymaayong laki nga makasulbad gilayon ning problema sa trapiko nga namugna og binilyon nga danyos sa ekonomiya tungod sa kadaut sa trabaho ug negusyo. Tingali, ang average nga oras sa karsada sa usa ka commuter naa sa 45 minutos ngadto sa usa ka oras.

Mao na nga dunay uban nga mga trabahante nga sa kaadlawon pa lang mangandam na aron makalakaw og sayo sa ingon di mapiit sa trapiko sa karsada.

Hangtod nga magpadayon ang pagpanaghan sa mga sakyanan sa kadalanan ug way bag-ong mga karsada nga ablihan, kining problema karon mograbe pa. Mao na ang labing seguro. Samtang wa pay buksan nga dan, antuson na lang ang kadalanan.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph