Kaniadto daghan ang nangita hain na ang tag P20/kilo nga bugas humay nga gisaad ni Presidente Ferdinand Marcos Jr. Motunga-tunga na lang sa iyang termino, apan way bisan usa ka tipasi nga nakita.
Ug sa dihang sa miaging semana kalit lang siya nga nitunga dinhi sa Sugbo ug nag-presscon sa Kapitolyo aron ipahibawo nga mamaligya na ang nasudnong kagamhanan sa tag P20/kilo nga bugas humay.
Kadaghan sa bati nga reaksyon, gikan sa mga Duterte diehard ngadto sa Liberal Party nga supporters. Way nindot nga reaction, puro gyud bati ang nakita sa netizens nga daan nang kritikal sa administrasyong Marcos.
Gilabhan, gibugalbugalan kay nganong karon nga eleksyon na man. Unya di pa gyud tanan ang makapalit tungod kay kadto ra mang naa sa listahan sa kagamhanan kay nahisakop sa kabos nga hut-ong sa katilingban. Gikinahanglan nga duna kay QR code card. Gilista sab ni sa nasudnong kagamhan kay beneficiaries na sila daan.
Di gyud tuod maayo ang tayming. Nganong wa na man lang huwata nga mahuman ang eleksyon una ni gipamaligya? Di ba ni tipik sa tinguha nga tabangan ang mga kandidato nga suportado sa administrasyon? Inay makaayo, nakadaut hinuon og samot tungod sa negatibong reaksyon.
Bisan ang mga local government unit (LGU) nabalaka og maayo sa negatibong pagtan-aw niini sa mga netizen. Daan na gud nga naglagot ang Duterte supporters sa pagpa-impeach sa kongreso kang Bise Presidente Sara Duterte. Giusban pa sa pagpadakop ug pagbilanggo kang kanhi Presidente Rodrigo Duterte sa International Criminal Court sa The Hague, Netherlands.
Bisan tan-awon pa ang mga post sa nagkadaiyang news outlets, negatibo kaayo ang perception sa netizens. Ang mga komentaryo puro kasuko.
Di maayo ang tayming. Di sab maayo ang pagpadala sa mensahe. Wa giklaro kon kinsa ra ang makapalit. Nagtuo ang kadaghanan nga bisan kinsa, apan limitado ra diay ang mabaligyaan ug gikontrolar sab ang kadaghanon matag semana. Tag 10 ka kilo matag pamilya nga beneficiary ug senemana sab ang pagpalit.
Nisaad si Gobernador Gwen Garcia nga magpadayon ni hangtod sa Disyembre sa dihang wa pa nimando ang Dept. of Agriculture (DA) sa temporaryong paghunong ini kay way approval sa Commission on Elections (Comelec).
Nakapanghupaw na ang mga LGU nga nakuyawan. Kon ibalik na human sa election ban, sawayon pa ba kaha ni nga proyekto? Seguradong naa kay nganong di tanan ang baligyaan, gipili ra man.
Maayo na lang tawon ni sa yano kaayong mga pamilya nga maglisod gani sa pagkaon sa makaduha sa tulo ka adlaw. Kadtong pamilya nga period usahay ang sud-an. Kana bang ang kan-on paresan na lang og asin o di man gani, patis.
Kon kaniadto magpanghikap pa sila kon unsay kan-on sa sunod nga tingkaon, karon naa na silay malauman nga pangsagang sa grabeng kagutom matag adlaw. Samtang ang netizens nangasuko, ang sector nga makadawat niini nangalipay.
Taas gud kaayo ang linya sa unang adlaw sa pagpamaligya.
Unta, gihuwat sa Malacanang nga mahuman ang election una gipahibawo ang pagpamaligya. Unya giklaro daan nga ang makapahimulos lang kadtong mga beneficiary na daan sa hinabang sa kagamhanan. Hayan di ingon niadto kagrabe ang reaksyon sa biklunon na kaayong mga tawo.