Editoryal: Yano’ng pagtimbaya

Editoryal: Yano’ng pagtimbaya
Art by John Montecillo

Biyaan una nato ang debate sa daghang mga isyo bahin sa preparasyon kay panahon karon sa panaghiusa sa pagseguro sa kalampusan sa 2024 Palarong Pambansa.

Karong adlawa, Hulyo 6, pormal nga programa sa pag-welcome sa mga opisyal ug mga atleta ipahigayon sa Cebu City Sports Center (CCSC).

Ang aktuwal nga kompetisyon sa labing dako nga paugnat-sa-kusog sa nasod mosikad sa Martes, Hulyo 9, 2024.

Ug kagahapon, Hulyo 5, gibana-bana nga kapin na sa 20,000 ka mga dumuduong ang ania sa dakbayan sa Sugbo - mga atleta, coaches, mga opisyal ug uban pang kauban sa delegasyon.

Samtang, ang kalampusan sa pag-host sa Palaro dili lang masukod sa kalidad sa pasilidad ug kahan-ay sa pagdumala, naglakip sa atong pagtagad ug pagseguro sa ilang kaluwasan.

Dinhing bahina dako kita og matabang nga mga lungsuranon, ang pag-atiman sa mga bisita aron mouli sila sa ilang tagsa-tagsa ka mga rehiyon dala ang maayong kasinatian.

Ang yano nga pagtimbaya ug pagpakita sa atong matam-is nga pahiyom dili katugbang nga salapi ug maoy mahika nga makapagaan sa pagbati ug mopatik og impresyon.

Sa pagkatinuod, ang kalampusan sa 2024 Palarong Pambansa dili lang garbo alang sa mga lokal nga opisyal apan, magsalamin usab kini sa kinatibuk-ang Sugbuanon.

Gawas pa, kita usab ang makabenepsiyo sa pagtuyok sa lokal nga ekonomiya mugna sa daghang mga dumuduong sa dakbayan tungod sa Palaro.

Atong suportahan ug magpakabana. Bisan diha sa pagtagbo sa dalan, mohatag kita sa yano’ng pagtimbaya isip mahigalaon nga Sugbuanon.

Kini ang ikatulong pag-host nato sa Palarong Pambansa. Una niadtong 1954 ug ikaduha niadtong 1994 nga pulos gidayeg tungod sa maayong pagkadumala.

Himuon usab nga dalaygon ug halandumon ang 2024 Palarong Pambansa sa Sugbo ubos sa atong panaghiusa.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph