Gidagsang na karon ang Probinsiya sa Siquijor sa mga langyaw og lokal nga mga turista tungod sa ilang maanindot nga mga suroyanan sama sa Cambugahay Falls, Old Balete Tree, Cantabon Cave, Lagaan Falls, Sambulawan Underground River, Paliton Beach ug daghan pang uban.
Atong makita sa mga post sa Facebook nga daghan kaayo nga mga pasahero nga maghuwat nga makasakay sa fastcraft aron manglaag sa Siquijor uban sa ilang pamilya o ba kaha mga barkada.
Sa unang panahon, ang mga rota sa fastcraft gikan sa siyudad sa Sugbo adto ra gyud sa Tagbilaran City port sa Probinsiya sa Bohol ug sa Dumaguete City port sa Negros Oriental, ug labyan ra ang Siquijor.
Apan karon, aduna nay daghang biyahe paingon sa Siquijor nga manukad sa Liloan port sa Lungsod sa Santander, Dumaguete City port, ug Cebu South Bus Terminal via Ceres bus.
Buot ipasabot nag-trending ang isla kay daghan nga mga tawo ang nakuryoso ug gusto nga makakita unsay naa sa Siquijor.
Sa akong pangagpas, nagsugod kini dihang nag-fairy walk ang aktres nga si Anne Curtis sa Cambugahay Falls nga nahimutang sa Lungsod sa Lazi.
Sukad niadto, daghan na ang nidayo sa lugar ug nisundog sa gibuhat sa aktres.
Apan taliwala niini, adunay bag-ong nitumaw nga balita nga nasudlan og Zoonotic disease ang maong isla, usa ka bacterial infection nga kasagarang makaapekto sa mga kabayo, asno, ug mula.
Kini mahimong mapasa sa tawo.
Gikumpirmar ni Siquijor Governor Jake Villa ang presensya sa mga kaso sa sakit nga zoonotic sa probinsiya.
Sa usa ka Facebook post, giawhag ni Villa ang publiko nga mag-amping, ilabi na kadtong na-expose sa mga kanding, kabaw, ug uban pang binuhing hayop.
“Ang probinsya sa Siquijor aduna nay confirmed cases sa sakit nga zoonotic disease nga gikan sa masakiton nga hayop ug posibleng motakod sa tawo,” nagkanayon ang gobernador.
Si Razel Nikka Hao, direktor sa Department of Health (DOH) Negros Island Region (NIR), nipasabot nga ang pagpasa sa sakit nga zoonotic sama sa Glanders gikan sa tawo ngadto sa tawo “talagsa ra kaayo.”
Matod sab niya nga matambalan ang sakit.
Ang Siquijor Provincial Health Office (SPHO), niingon niadtong Lunes, Mayo 19, 2025, nga nagpadayon pa ang ilang imbestigasyon.
Hinuon, naghuwat pa ang SPHO sa resulta sa unang batch sa mga sample nga ilang gisumite alang sa pagsulay.