Elasto Painters, Tropang Giga midaog

BATANG ILDEFONSO: Milusot si Shaun Ildefenso, anak ni PBA great Danny, atol sa duwa sa Rain or Shine Elasto Painter kontra Terrafirma Dyip sa PBA Philippine Cup. /
BATANG ILDEFONSO: Milusot si Shaun Ildefenso, anak ni PBA great Danny, atol sa duwa sa Rain or Shine Elasto Painter kontra Terrafirma Dyip sa PBA Philippine Cup. / Hulagway sa PBA Images

Nagmalampuson ang Rain or Shine Elasto Painters ug TNT Tropang Giga sa ilang tahas sa Philippine Basketball Association (PBA) Philippine Cup niadtong Sabado, Abril 13, 2024, nga giduwa sa manag­lahi nga korte.

Migawas ang nindot nga kolor sa Elasto Painters ug gilupig ang Terrafirma Dyip, 116-104 sa Caloocan Sports Complex; samtang gipatapsingan sa Tropang Giga ang NLEX Road Warriors, 104-101, didto sa Candon City Arena sa Candon, Ilocos Sur.

 BISDAK: Miitsa ang Cebuano guard nga si RR Pogoy sa TNT Tropang Giga batok sa depensa sa NLEX Road Warriors sa PBA Philippine Cup. /
BISDAK: Miitsa ang Cebuano guard nga si RR Pogoy sa TNT Tropang Giga batok sa depensa sa NLEX Road Warriors sa PBA Philippine Cup. / Hulagway sa PBA Images

Giinat sa Rain or Shine ang ilang win streak ngadto sa upat ka sunodsunod nga duwa ug misaka kini sa 4-4 (win-loss) rekord para sa solo fifth place.

Nakabangon ang Rain or Shine sa upat ka sunodsunod nga pilde sa pagsugod sa Phi­lippine Cup.

Ang beterano nga bigman nga si Beau Belga maoy nangu­sog sa kadaogan pinaagi sa iyang 19 puntos, pito ka rebounds ug walo ka assists.

Samtang si Andrei Caracut maoy dugang nga mibabag sa Dyip sa iyang double-double nga 17 puntos ug 10 rebounds.

Ang Dyip nasugamak sa ilang ikaduhang sunodsuond nga pilde, natagak kini ngadto sa ikawalo nga pwesto bitbit ang 4-5 nga baraha.

Nabaraw ang nindot unta nga individual output ni top rookie pick ug sinaligan sa Dyip nga si Stephen Holt nga hapit maka triple-double sa stat line nga 20 puntos, walo ka rebounds ug 13 assists.

Sa Ilocos Sur, gipapas sa TNT ang 12 puntos nga labaw sa NLEX aron moratsada ngadto sa kulbahinam nga 104-101 nga kadaogan.

Ang tres ni RR Pogoy maoy mihatag sa TNT og 103-101 nga labaw.

Nakuha sa Tropang Giga ang importante nga duwa og misaka ang ilang rekord ngadto sa 4-3, samtang ang sister team nga NLEX miubos sa 5-2 nga baraha.

Nakahimo si Calvin Oftana og career-high 37 puntos, 12 rebounds ug unom ka assists samtang si Pogoy midugang og 21 puntos alang sa TNT.

Duna pa untay tsansa ang NLEX nga dalhon ang duwa sa overtime, apan nasipyat si Robert Bolick sa potensiyal nga game-tying tres sa ilang final possession.

Si Robbie Herndon mitabla sa iyang career-high nga 25 puntos ug si Bolick mibuhat og 23 puntos sa ilang losing effort para sa NLEX.

Niining pagsuwat, nagkombati ang Phoenix Fuel Masters (2-4) batok Magnolia Chicken Timplados Hotshots (2-2); ug Barangay Ginebra Gin Kings (4-3) batok Northport Batang Pier (4-2) sa Ninoy Aquino Stadium. / RSC

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph