Nanawagan ang legal counsel ni Cebu Governor-elect Pamela "Pam" Baricuatro nga i-dismiss without further proceedings ang giduso nga election protest ni outgoing Cebu Governor Gwendolyn Garcia subay sa nakab-ot nga resulta sa piniliay sa Mayo.
Sa giluwatan'g pamahayag sa kampo ni Baricuatro, giingong walay kapasikaran ug kuwang sa pagpamatuod ang pasangil sa gikatahong tikas sa botos ug sa sistema sa mga makina nga gigamit sa election.
"In a filing prepared and submitted on behalf of Governor-elect Baricuatro, the protest is described as devoid of merit, and the legal team respectfully prays for its outright dismissal without further proceedings," saysay sa giluwatang pamahayag sa kampo ni Baricuatro sa Hunyo 17, 2025.
Ang legal counsel ni Baricuatro gipangulohan ni Atty. Alberto Agra ubos sa Batuhan Blando Law Offices, samtang ang collaborating counsel niini pinangulohan ni Atty. Alberto Garcia.
Gihulagway sab sa mga abogado nga ang gidusong election protest ni Garcia usa lamang ka "nuisance suit" ug "commentary and an op-ed page of a tabloid."
Gihimug-atan sab sa mga abogado nga ang kadaugan ni Baricuatro, nikulit og kasaysayan sa Lalawigan sa Sugbo kinsa usa ka civic leader nga giingong wa mailhi, walay makinarya ug access sa government resources.
Nisalig ang kampo ni Baricuatro nga mahatagan og pagtagad sa Commission on Elections (Comelec) ang
ilang hangyo ug paghatag og patas nga pagtratar sa maong isyu.
Gisubli sab niini nga ang nakuha nga 1.1 milyon nga botos ni Baricuatro subay sa uwahing election results giingong nagpamatuod lamang sa pag-aprobar sa mga Sugboanon sa bag-ong mandato. / ANV