Electrician nakuhaan og kapin sa usa ka kilo’ng shabu sa buy-bust sa alas 4:35 sa kaadlawon sa Biyernes, Mayo 10, 2024, sa Sitio San Rafael, Brgy. Tanke, dakbayan sa Talisay.
Ang suspek giila nga si Joey Trocio Gabrillo, 29, dunay kapuyo, taga taga Urban Poor, Brgy. Maghaway, Talisay City.
Si Police Lt. Col. Epream Paguyod, hepe sa Talisay City Police Station, maoy nangulo sa buy-bust uban sa Drug Enforcement Unit sa Talisay City Police.
Matod ni Paguyod nga ang drugas motimbang og 1,200 grams nga mobalor og P8,160,000.
Si Paguyod, nga nahinabi sa Superbalita Cebu, niingon nga usa ka semana nga ilang gi-monitor ang suspek.
Nasubay nila nga usa kini ka bodegero sa drugas ug bag-uhay lang nga nitumaw ang ngalan.
Ang suspek dunay amo nga naa sulod sa bilanggoan samtang ang tinubdan sa drugs gikan sa dakbayan sa Sugbo.
Matod ni Paguyod nga makabaligya og shabu nga kinilo sa semana ang suspek.
Gipalitan nila og usa ka dakong bulto sa shabu nga mobalor og P50,000 gamit ang fake nga kwarta.
Dihang napusasan, si Gabrillo nakuhaan pa og laing upat ka dagkong putos sa shabu, usa ka android phone, P600 nga halin, ubang mga sudlanan sa drugas ug usa ka motorsiklo. / GPL