Nagmangtas si Joel Embiid sa iyang pagbalik ug nagpakatap kini og 31 puntos aron pangulohan ang daog sa Philadelphia 76ers batok sa hosts Chicago Bulls, 108-100, kagahapon, Disyembre 9, 2024 (PH time), sa National Basketball Association (NBA).
Human nasipyat sa iyang nag-unang pito ka
itsa, ang two-time NBA scoring champion, nakabawi ug nakapasulod kini og walo sa nagsunod niyang 10 ka itsa nga maoy hinungdan nga nakarehistro og 62-50 nga labaw ang 76ers sa halftime.
Nainat sa 76ers ang ilang labaw ngadto sa 19 puntos ug wala na sila motugot nga mailog sa Bulls ang labaw hangtod na sa katapusang gutlo.
Hinuon, adunay mga higayon nga moaksyon pagpanghudlat ang Bulls apan nasanta ra kini sa 76ers.
“I just got lucky and started making shots. We just missed shots and we adjusted and we got them in,” matod ni Embiid, kinsa nakapalta sa niaging pito ka mga duwa sa 76ers tungod sa angol sa iyang tuhod ug tulo ka duwa nga suspensyon.
Tungod sa NBA Cup, ang sunod duwa sa 76ers karon pang Sabado, Disyembre 14, nga nakahatag og igong panahon aron mas maalim ang angol ni Embiid. / AP