Human sa hataas nga pagpalta, sa makausa pa, mobalik na usab ang Emil's Fresh Chicken Cup Open Invitational basketball tournament nga ipahigayon diha sa Barangay Linao-Lipata Sports Complex, sa lungsod sa Minglanilla, Cebu.
Unom ka mga teams ang gipaabot nga magtigi sa maong torneyo nga usa sa mga kalihukan alang sa naghinangat nga kapistahan sa barangay.
Si Emil Oberes, ang overall chairman sa tournament mibutyag nga aduna nay unom ka mga teams ang misanong sa imbitasyon sa nahisgutang tournament nga posibling masugdan sa Hulyo 19, (adlawng Biyernes), 2025.
Aron pagtino sa ilang partisipasyon, si Oberes mopahigayon og meetings sa mga teamowners o coaches karong Miyerkules, Hulyo 9 sa El Corso sa South Road Project (SRP).
Kon kahinumduman, katapusang napahigayon ang Emil's Fresh Chicken Fiesta Cup Open Invitational niadtong 2019.
Apan naputol ang pagpahigayon niini gumikan sa pagkatap sa sakit nga Covid-19 sa tuig 2020. Adunay natigayon nga Emil's Cup sa niaging tuig apan kini gitumong lang ngadto sa mga sityo sa maong barangay.
Ganting salapi ang nakahan-ay alang sa mga mananaog sa torneyo. / JBM