Nakagawas na sa Philippine Area of Responsibility (PAR) ang Bagyong Emong niadtong Sabado sa buntag, Hulyo 26, 2025, matod sa state weather bureau.
Ang maong bagyo nga nagdala og dakong kadaot sa Luzon, mibiya sa PAR alas 11 sa buntag sa naasoy nga adlaw.
Apan ang Philippine Atmospheric, Geophysical and Astronomical Services Administration (PAGASA) nagkanayon bisan og wala na kini sa PAR ug walay natala nga laing bagyo sa pagkakaron, padayon nga nakatampo si Emong sa Southwest Monsoon o habagat, nga mao ang nagdala og kusog nga pag-ulan ug kusog nga hangin sa dagkong bahin sa nasod.
Lakip sa mga apektado nga lugar ang Batanes, Babuyan Islands, Ilocos Region, Cordillera Administrative Region, Central Luzon, Metro Manila, Calabarzon, Mimaropa, Bicol Region, Northern Samar, Western Visayas, Negros Occidental, ug Davao Oriental.
Kining bati nga kondisyon sa panahon gilauman nga magpadayon hangtod sa Lunes, Hulyo 28.
Nipasidaan usab ang PAGASA sa kasarangan ngadto sa dagko nga balod nga kahimtang sa kadagatan sa nagkalainlaing baybayon sa nasod, ilabi na sa amihanang Luzon ug kasadpang mga baybayon sa nasod.
Ang gitas-on sa balod mahimong moabot ngadto sa upat ka metros, ug gitambagan kadtong gagmay nga mga sakayan, ilabina kadtong gipadagan sa walay kasinatian nga mga marinero, nga dili una molawig.
Alas 11 sa buntag, si Emong anaa sa 695 kilometros amihanang-sidlakan sa Itbayat, Batanes, dala ang kusog nga hangin nga 55 kilometros matag oras ug paghuros nga 70 kilometros matag oras.
Nag-irog kini amihanan-amihanan-silangan ibabaw sa East China Sea sa gikusgon nga 35 km/h ug gilauman nga mohuyang kini sa iyang gikusgon. / JGS