Yano ra kaayo nga gipunit sa kawatan ang selpon sa empleyado sa usa ka 24/7 nga tindahan nga nahimutang sa may dalan Spolarium, Barangay Duljo-Fatima, Dakbayan sa Sugbu alas 5 sa buntag, Lunes, Mayo 26, 2025.
Si Buenvenido Canaña, 31, ulitawo, empleyado sa Sittis Mini Mart nga taga Barangay Inayawan, Cebu City, dali nga nangayo og pakitabang sa Mambaling Police Station uban sa iyang hinigugma.
Si Canaña nga nahinabi sa Superbalita Cebu, niingon nga nanglimpyo siya sa pansayan sa tindahan dihang gipunit sa suspek ang iyang Samsung A05S nga balor og P7 mil.
Ang wala mailhing suspek wala mabantayi sa ilang cashier niadtong higayuna ug yano ra kining nakasulod.
Matod sa biktima nga nagpa-music siya sa selpon samtang nanglimpyo sa pansayan apan nahibulong siya nga nawagtang og kalit ang tukar nga iyang gi-connect sa bluetooth speaker.
Dugang niya nga nilantaw pa sa pansayan ang suspek una pa kini migawas sa tindahan.
“Random to na music ako gipatukar sa selpon sir! Natingala ko napawong ang music nga konektado sa bluetooth gikawat na di-ay” dugang ni Canaña.
Sa ilang paglantaw sa CCTV camera, nakuhaan og footage ang suspek.
Ila kini'ng gitawagan apan dili motubag.
Sa sunod nilang tawag, dunay gikasulti ang suspek diin gibaligya niya ang selpon og P5 mil apan gihangyo og P1,500 sa nakapalit.
Samtang naminaw sila, ilang gihangyo nga ibalik ang selpon apan giputol sa suspek ang koneksyon ug hangtod ning pagsuat dili na kini makontak.
Ang biktima nanghinaot nga unta mo-report sa kapulisan ang tawo nga nakapalit sa iyang selpon. / GPL