PRISOHAN ang natugpahan sa 29-anyos nga habal-habal driver dihang gidakop siya kay gipasanginlan nga nituok sa babayeng enforcer pasado alas 5:00 sa hapon niadtong Hulyo 7, 2025, sa Barangay Maghaway, Dakbayan sa Talisay.
Ulahi na ang pagmahay ni alyas Lauro, minyo nga taga Barangay Maghaway dihang desidido ang City of Talisay -Traffic Operations Development Authority (CT-Toda) nga mopasaka og kasong direct assualt batok kaniya.
Nibutyag si Jonathan Tumulak, ang pangulo sa CT-Toda nga ang 24-anyos nga babayeng enforcer kuyog sa iyang kauban ang nag-roving ug ilang nakit-an ang driver sa habal-habal nga upat kabuok sakay nga mga menor de edad.
Gipahunong sa mga enforcer ang driver apan nasuko ug giingong nituok sa babayeng nisita kaniya .
Apan sulod sa detention cell sa Talisay City Police Station, ang suspek nanghimakak nga iyang gituok ang babayeng enforcer apan nangatarungan nga iya rang gidasmagan sa iyang abaga.
Matod sa suspek nga nakalitan lang siya sa hitabo ug nangayo siya og pasaylo sa sakop sa CT-Toda.
Si Tumulak nga wala mahimuot sa gibuhat sa drayber ngadto sa babayeng enforcer nibutyag nga ila gyud kining pasakaan og kaso. / VLM