Patay nang nadangat sa Cebu City Medical Center (CCMC) ang usa ka 36 anyos nga lalaki human nadasmagi sa naghaguros nga motorsiklo samtang nitabok alas 9:30 sa gabii, Miyerkules, Mayo 7, 2025, sa dalan V. Rama, Ba-rangay Calamba, Dakba-yan sa Sugbo.
Ang biktima giila nga si Anthony Etulle Fortes Jr., traffic enforcer sa Cebu City Transportation Office (CCTO) nga re-sidente sa Barangay Calamba.
Ang nakabangga sa biktima usa ka Yamaha Y2F-R3 nga dunay plate number nga GD55808 nga gimaneho ni Eligius John Tejedor Villasin, 25, taga Barangay Pajac, Dakbayan sa Lapu-Lapu.
Sa imbestigasyon sa Traffic Enforcement Unit sa Cebu City Police Office, nitabok ang biktima sa dalan sa V. Rama ug kalit lang nga nabanggaan sa nag-haguros nga motorsiklo.
Tungod sa kakusog nalagpot ang biktima ug nabundak ang ulo sa semento nga maoy hinungdan sa naangkon niining dakong kadaot.
Dali siya nga gidala sa CCMC apan gideklarar siya ni Doctor Orgil Arrabis nga dead on arrival.
Kasamtangan nga gikustodiya sa TEU custodial facility si Villasin ug giandaman na og kasong Reckless Imprudence Resulting in Homicide ug gitakdang ipaubos sa drug test. / AYB