Tun-an sa Lapu-Lapu City Government ang pagkunhod sa P100 nga environmental fee alang sa mga local tourist, human makadawat og feedback gikan sa local service providers ug sa gipatuman nga one-year assessment sa mga lagda.
Ang ordinansa nakakolekta na og P22 milyunes sa buhos sukad kini gipatuman niadtong Mayo 1, 2024.
Si konsehal Annabeth Cuizon, chairman sa Committee on Finance, nitug-an sa SunStar Cebu niadtong Martes, Mayo 27, 2024, nga ang sugyot nga konhuran ang environmental fee sa mga lokal nga bisita gikan sa P100 ngadto na lang sa P20, ilang tun-an.
Kini nitumaw human ang mga boat operator nipadayag og kabalaka sa pagminos na sa mga Filipino guest nga gustong mag island-hopping.
Agi og tubag, ang mga opisyal aminado sa sugyot nga pagkunhod.
Matod ni Cuizon nga sa consultative meeting niadtong Mayo 21, ang mga apektado nga mga boat operator nabalaka nga wala nay mga lokal nga turista manuroy tungod sa kadako sa gikolektang bayranan.
“Our assessment naturally took into consideration the requests aired by some pumpboat operators to adjust the [environmental fee] rate,” matod ni Cuizon.
“We believe in being consultative. Maminaw man gyud ta sa mga hingtungdan ining atong mga balaod,” sigon niya.
Samtang si Congressman-elect Junard “Ahong” Chan niawhag sab sa konseho nga usbon ang environmental fee ordinance aron matubag ang ekonomikanhong panginahanglan sa island-hopping ug sa boat operators.
Ang hangyo ni Chan iyang gipahayag sa iyang Facebook page niadtong Mayo 22 human sa consultative meeting.
Gitumbok ni Chan nga nauyonan nga ang mga taga Lapu-Lapu City makapadayon sa pagpahimulos sa libreng environmental fees kon sila ang mag-island hopping.
Sa mga local tourist o mga bisita nga mga Pinoy nga dili taga Lapu-Lapu City, ang bayran nila nga environmental himuon na lang P20.
Apan ang foreign tourists o foreign nationals mobayad gyud og P100.
Sukad napatuman ang ordinansa, moabot na sa kinatibuk-an nga P22,148,524 ang nakolekta gikan sa environmental fee nga nakatabang kaayo aron makapundo sa mga proyekto nga gisugyot sa City Environmental and Natural Resources Office, apil ang pagpamalit og dugang dump trucks.
“It might affect future projects but the good thing about it is that we have already saved a substantial amount of funds for the past one year of the [Environmental Fee] collection. This amount will readily offset any adverse effect of the proposed adjustment,” matod ni Cuizon. / DPC