Suspendido ang paglawig sa mga barko sa kadagatan sa Bohol ug Northern Cebu subay sa nasinati nga dagkong bawod nga posibleng magdala og risgo sa mga mobiyahe.
Kini maoy gipahibalo ni Lieutenant Junior Grade Abel Jan Lomboy, tigpamaba sa Philipine Coast Guard (PCG) District Central Visayas sa Huwebes, Hulyo 17, 2025.
Niluwat og mando ang PCG nga dili tugotan nga makalawig ang mga barko sa Northern Cebu nga dunay gibug-aton nga 35 gross tonnage ug ubos pa niini.
Samtang sa Lalawigan sa Bohol, gidid-an sab makalawig ang mga barko nga dunay gibug-aton nga 15GT.
Apan matod ni Lomboy, magdepende gihapon sa shipping lines kon mosuspenso ba kini sa mga biyahe sa barko nga molabaw sa gidili nga gross tonnage.
Ang coast guard nipahimangno sa tanang mga mananagat nga dili mopugos sa pagpanagat ilabi na nga dili maayo ang tempo sa panahon.
Pipila sab ka mga pasidaan ang giluwatan sa PCG sa mga molawig sama na lang sa pagdala sa mga emergency equipment niini sama sa life jacket, radyo, cellphone, ug ubang ekipo nga makatabang nga daling matabang sa awtoridad kon dunay emerhensya.
Giawhag sab niini ang tanan nga kanunay nga mosusi sa updates sa panahon aron mahan-ay ang mga lakaw ug dili masugamak sa risgo.
Alang sa mga pasahero nga nakakuha na daan og ticket, gipahimangnuan usab nga mo coordinate sa shipping company o ticketing office alang sa mga kausaban sa iskidyul sa biyahe.
Subay niini, nanawagan si Cebu Governor Pamela Baricuatro sa mga Sugboanon nga magmatngon subay sa nasinating epekto sa Bagyong Crising sa nasod.
Si Baricuatro nipadayag sa iyang panawagan diha sa social media sa Hulyo 17, 2025.
Subay niini, pipila ka mga lokalidad nisuspenso sa klase tungod sa grabeng uwan ug pagbaha nga nasinati.
Nalakip sa mga lungsod nga nipahibalo sa suspension sa classes ang Daanbantayan, Santa Fe, Samboan, Medellin, Alcoy, Tabogon, Bogo City, Santander, San Remigio, Minglanilla, Malabuyoc, dakbayan sa Mandaue, Sogod, Tuburan, Tabuelan, Alcantara, Dalaguete, Badian, ug Moalboal.
Subay sa pasiunang taho sa Cebu Provincial Disaster Risk Reduction and Management Office (PDRRMO), nasinati ang pagbaha sa pipila ka bahin sa lalawigan lakip ang Dakbayan sa Talisay ug nasinati sab ang pagdahili sa yuta sa Barangay Lagtang.
Ang PDRRMO gimanduan sab sa gobernardor sa pagsusi sa mga kalungsoran aron masubay ang kahimtang niini ilabi na ang kadaot nga gidangatan tungod sa sagunson nga pag-uwan. / ANV