Gihimakak ni Senate President Francis “Chiz” Escudero niadtong Martes, Agusto 12, 2025, ang pasangil nga aduna siyay kalambigitan sa flood control projects sa tibuok nasod.
Sa usa ka press conference, giangkon ni Escudero nga amigo niya si Lawrence Lubiano, ang presidente sa Centerways Construction and Development Inc. ug usa sa iyang mga campaign contributors sa 2022 Senate race.
Matod niya nga sila si Lubiano parehong taga Sorsogon.
Ang Centerways Construction and Development Inc. usa sa nag-unang 15 ka kompanya nga nakakuha og 20 porsiyento, o P100 bilyunes sa kinatibuk-ang P545 bilyunes nga kantidad sa mga proyekto sa flood control sa tibuok nasod gikan sa Hulyo 2022 hangtod sa Mayo 2025, base sa mga rekord nga gipahibalo ni Presidente Ferdinand Marcos Jr. sa Lunes, Agusto 11.
“For the record, wala akong kinalaman sa pag-identify, paggawa ng program of work, pag-bid, pag-award, pagbayad, pag-inspeksyon ng anumang proyekto sa pamahalaan sa Sorsogon man o sa labas ng lalawigan ng Sorsogon,” matod ni Escudero.
“Wala at hindi ko alam nga kung ano man 'yun dahil hindi ako bahagi ng kanyang (Lubiano) kumpanya at wala akong pakialam sa kanyang negosyo,” dugang niya.
Gikuwestiyon sa senador ang tayming sa mga “malisyoso” nga mga alegasyon nga gibato batok kaniya.
Siya nipadayag og pagtuo nga ang “demolition job” batok niya buhat kini sa mga tawo nga nipabor sa impeachment ni Bise Presidente Sara Duterte, partikular na sa House of Representatives.
Si Escudero nipabor sa pag-archive sa articles of impeachment nga gisang-at sa Senado sa House of Representatives human kini gideklarar nga unconstitutional sa Supreme Court (SC) tungod sa paglapas sa usa ka tuig nga bar rule.
Ang Ubos Balay Balauranan nisang-at og motion for reconsideration sa hukom sa SC.
"Hindi principally kasamahan namin dito sa Senado. Sa pagkakaalam namin sa labas pero hindi ko alam kung may tumutulong, ka-kuntsaba, o kakumplot pero taga-labas," sumala ni Escudero.
"Obvious naman siguro 'yun kung sino ang may pinaka-gusto ng impeachment," dugang niya.
Atol sa iyang ikaupat nga State of the Nation Address, si Marcos nimando alang sa paghimo sa usa ka lawom nga imbestigasyon sa mga iregularidad sa mga proyekto sa pagpugong sa baha sa tibuok nasod tungod sa bag-ohay nga dagkong mga pagbaha nga niigo sa mga komunidad sa panahon sa pag-atake sa habagat ug sa sunod-sunod nga mga bagyo. / TPM / SunStar Philippines