Nanumpa si Senate President Francis “Chiz” Escudero niadtong Lunes, Hunyo 9, 2025, isip presiding officer sa impeachment court alang sa impeachment trial ni Bise Presidente Sara Duterte.
Atol sa plenary session, si Senador Joel Villanueva nihimo og mosyon alang sa pagpanumpa sa mga senador-huwes sa Martes, Hunyo 10, sa alas 4:00 sa hapon ug sa panagtigom sa impeachment court karong Miyerkules, Hunyo 11.
Si Villanueva nihimo sab og mosyon sa pagduso sa reklamo ngadto sa Committee on Rules.
Gisundan niini ang pagpahayag ni Minority Leader Aquilino “Koko” Pimentel III kinsa niawhag sa kamara sa pagsugod dayon sa trial proceedings base sa gimando sa konstitusyon.
Ang minoriya nga pundok, lakip sila Senador Koko Pimentel ug Risa Hontiveros, wala pormal nga nisugod sa impeachment trial ni Duterte.
Gisugyot ni Pimentel ang pipila ka mosyon, gisegundahan kini ni Hontiveros:
1. Suspendihon ang lehislatibo nga kalihukan sa Senado.
2. Tigumon ang Senado ngadto sa usa ka impeachment court sa Lunes imbes sa Miyerkules, Hunyo 11.
3. Si Senate President Chiz Escudero manumpa isip presiding officer.
4. Si Escudero modumala sa panumpa sa mga senador nga anaa.
5. Ang impeachment court motawag sa impeachment case batok ni Bise Presidente Duterte ug maghimo og trial calendar.
6. Ang impeachment court mohangyo sa mga piskal sa pagbasa sa mga artikulo sa impeachment sa Martes, Hunyo 10.
7. Usa ka writ of summons ang ipagawas dayon kang Duterte.
Ang impeachment ni Duterte naglakip sa unom ka dagkong mga alegasyon. Naglakip kini sa giingong paglapas sa 1987 Konstitusyon, sa Anti-Graft and Corrupt Practices Act, ug uban pang mga balaod.
Ang mga alegasyon batok kang Duterte naglakip sa pasangil nga nakigkunsabo siya sa planong pagpatay kang Presidente Ferdinand “Bongbong” Marcos Jr., sa iyang asawa, ug kang Romualdez.
Gitumbok sab ang giingong dili saktong paggamit sa P612.5 milyunes nga confidential funds gikan sa Office of the Vice President ug sa Department of Education (DepEd) gikan sa 2022 ngadto sa 2024, ug ang panuhol ug korapsyon sulod sa DepEd.
Gihisgotan sab sa reklamo ang wala na-declare nga bahandi ni Duterte, ang pagkapakyas sa pagbutyag sa mga kabtangan, pagkalambigit sa extrajudicial killings panahon sa iyang termino isip Davao City Mayor, ug pag-apil sa destabilisasyon, insurereksyon, ug kagubot sa publiko. / TPM / SunStar Philippines