Gilungkab sa wa pa mailhing kawatan ang usa ka eskwelahan sa lungsod sa Consolacion diin nakuha ang duha ka TV ug amplifier mga ala 1 sa kadlawon, Dominggo, Hulyo 27, 2025.
Ang mga gipangkawat nga kabtangan didto nahimutang sa opisina sa principal sa Lanipga National High School.
Nadiskubrehan ang maong insidente alas 6 na sa buntag dihang nag-roving ang utility personnel sa maong eskwelahan para pawngon ang mga suga.
Matud sa principal sa eskwelahan, gipugos pag-abli sa kawatan ang gate kilid sa eskwelahan dayon nisulod kini sa iyang opisina pinaagi sa pagliwat sa kandado sa door grill.
Gipangputol usab sa suspek ang wire nga nagkutay sa CCTV atubangan sa principal’s office, apan aduna pay laing CCTV nga wa niya makit-i diin nakuhaan siya og video. Nakita sa CCTV nga usa ra ka tawo nga nagsul-ob og face mask ug hoodie ang mihimo sa maong salaud.
Apan ang principal nagtuo nga duna pa kiniy laing kauban sanglit maglisud kini og karga sa mga kinawat nga butang.
Matud sa mga residente nga nakadungog sab silag paghot sa iro atol sa hitabo apan wala lang nila kini panumbalinga.
Sa pagka-karon, nakig-coordinate na ang maong eskwelahan ngadto sa Consolacion Municipal Police Station alang sa pag-ila sa responsable niini. / JDG