Usa sa gibutyag sa social media personality ug ex-PBB celebrity housemate nga si Esnyr nga dihang nagsugod pa siya sa showbiz, usa si Donny Pangilinan sa nitabang kaniya.
Sa interview ni Esnyr kang Melai Cantiveros sa "Kuan On One S3," gibutyag niini nga sa salida nila ni Donny ug Belle Mariano siya una nilugwa sa big screen.
Tuig 2021 kini dihang nabantayan ang iyang presensya sa social media sa Star Cinema ug gikuha siya og cameo sa salida sa loveteam nga "Love Is Color Blind."
Matod ni Esnyr nga daw mao kadto ang labing una nga nibiya siya sa Digos City ug first time sab nga makasakay og eroplano ug makatungtong og Manila.
Dihang naabot sa Manila si Esnyr, didto niya nahibaw-an nga wala siyay kaugalingon nga room ug kuyog kini sa art department sa production sa usa ka room nga naay bunk beds.
Ang maong shared room, wala usay CR mao nga tulo ka adlaw nga wala maligo si Esnyr.
Dihang napalingaw niya ang set ug ang direktor, didto sab niya nasuod si Donny ug Belle.
Nahibaw-an ni Donny nga wala siyay kaugalingon nga room ug ang aktor mismo ang niingon nga, "I'll book you a hotel."
Gawas sa pagkasuod nila ni Belle, gikuha sab si Esnyr sa manager sa aktres aron kuhaong talent.
Didto na nagsugod nga nasulod kini sa "He's Into Her" nga serye sa DonBelle ug nibunga maayo iyahang karera sa showbiz. / HBL