Sagubangon ni John Verga Espra sa Prime Fight Boxing Stable ang labing una niyang away sa gawas sa nasod karong Septiyembre 7, 2024, sa Incheon, South Korea.
Ning maong tahas, si Espra, 25, kinsa lumad nga taga Mandaue City, makigbatok ni Orkhontungalag Unubold, 24, sa Mongolia sa usa ka six-round flyweight bout.
Si Espra gikan sa tulo ka sunodsunod nga kadaugan diin ang katapusan niyang biktima mao ang kababayang si Filipino Franz Carl Muyso pinaagi sa unanimous decision niadtong Hulyo 20, 2024.
Gipangpukan sab ni Espra sila si Raffie Jamero pinaagi sa unanimous decision ug Celmar Abejuela pinaagi sa first round knockout.
Nanghinaot si Espra nga magpadayon ang iyang sunodsunod nga kadaugan.
Naggunit si Espra og 4-3, 2KOs nga rekord.
Si Espra maoy ikaduhang boksidor sa Prime Fight Boxing Stable nga moaway sa gawas sa nasod karong tuiga sunod ni Pete Apolinar, kinsa napilde pinaagi sa unanimous decision batok ni Matcha Nakagawa sa Utso, Japan niadtong Hulyo 28, 2024. / ESL