Si Senador Jinggoy Estrada ug ang negosyanteng si Janet Lim-Napoles giabsuwelto sa kasong plunder sa Sandiganbayan niadtong Biyernes, Enero 19, 2024, kalabot sa pork barrel scam tungod sa reasonable doubt.
Hinuon, si Estrada nakombikto sa kasong bribery tungod sa pagbalhin sa iyang Priority Development Assistance Fund (PDAF) ngadto sa mga peke nga non-government organizations nga gipanag-iya ni Napoles, nga nakadawat og sentensiya nga walo ngadto sa siyam ka tuig alang sa usa ka ihap sa direct bribery ug duha ngadto sa tulo ka tuig sa matag usa sa duha ka mga ihap sa indirect bribery.
Nag-atubang usab ang senador og suspensiyon sa pagkupot sa katungdanan sa publiko, temporaryo nga disqualification sa pagbotar, ug P3 milyunes nga multa.
Sa laing bahin, gikombikto usab sa korte si Napoles sa lima ka ihap sa corruption of public official pinaagi sa direktang pagsuborno, nga nagsentensiya kaniya og hangtod sa 10 ka tuig nga pagkabilanggo sa matag ihap ug multa nga P29.63 milyunes.
Napalgan usab siya nga sad-an sa duha ka mga ihap sa corruption of public official pinaagi sa indirect bribery nga dunay managsamang silot.
Gimanduan usab si Napoles nga bayran ang gobiyerno og P262.03 milyunes, lakip na ang interest, sa civil liability.
‘KICKBACK’
Ang mga kaso sa kurapsyon batok kang Napoles naggumikan sa paghatag og suborno kang Estrada, nga mokabat og P1 milyon niadtong Septiyembre 18, 2008, ug mga transaksyon nga gihimo pinaagi sa iyang kanhi deputy chief of staff, Pauline Therese C. Labayen, nga adunay hiniusang kantidad nga P8.87 milyunes sa upat ka lainlaing mga mga petsa.
Ang indirect bribery naglambigit sa P1.5 milyunes nga unang nadawat ni Estrada pinaagi sa usa ka intermediary, nga sa ulahi iyang giuli.
Ang mga kaso naglangkob sa mga transaksyon gikan sa 2004 hangtod 2012, diin ang mga akusado naapil sa mga kickback ug komisyon, nga nagrepresentar sa usa ka porsiyento sa mga gasto sa proyekto nga pundohan gikan sa PDAF ni Estrada.
Kini bugti sa pag-endorso sa mga NGO nga kontrolado ni Napoles nga gitudlo nga mga tigdawat ug tigpatuman sa mga ghost o tinumo-umo nga mga proyekto nga giingong nagsangkad sa nagkalainlaing lugar sa tibuok Pilipinas.
Sa report sa SunStar Philippines niadtong 2014, si Estrada mihimakak nga siya nakatigom, nakakakuha o nakaangkon og ill-gotten wealth ug niingon nga wala siyay partisipasyon o kasayuran sa pagbalhin sa bisan unsang kantidad nga kabahin sa iyang PDAF allocation ngadto ni bisan kinsa gawas sa legal nga tuyo niini nga mga benepisyaryo.
Dugang pa niya nga wala siyay nadawat nga salapi gikan ni Napoles o ni bisan kinsang tawo nga nakig-uban kaniya o sa mga NGO nga iya untang gipanag-iya o kontrolado.
Si Estrada niingon usab nga wala siyay labot sa pagpatuman sa mga proyekto ubos sa PDAF, ug nga ang iyang partisipasyon limitado lamang sa pag-ila sa usa ka proyekto gikan sa menu sa mga proyekto alang sa pundo nga gihatag sa balaod.
Gitataw sa senador nga ang iyang pag-endorso sa pipila ka NGOs gikan sa limitadong listahan sa mga duly ug kanhi accredited nga NGOs kay “recommendatory at best” nga ang pagpili sa NGO gibilin pa sa implementing agency.
Ang Sandiganbayan nagkanayon nga ang mga aksyon ni Estrada, lakip ang pagpangayo og PDAF allocations ug pag-endorso sa mga NGO ni Napoles, nalambigit sa iyang tahas isip senador, diin siya adunay hingpit nga kontrol sa pagpagawas sa pundo ug mga desisyon sa proyekto. Gipasiugda sa Korte nga kini nga mga pag-endorso dili mahitabo kon wala ang iyang posisyon isip usa ka publiko’ng opisyal.