Usa ka konsehal sa Lapu-Lapu City ang nagduso og ordinansa nga mag-obligar sa tanang komersiyal, pribado, ug institusyonal nga firing ranges nga hugot nga mosunod sa safety standards sa Philippine National Police (PNP) ug makakuha sa gikinahanglang mga clearance sa dili pa makapadayon sa operasyon.
Ang gisugyot nga lakang, nga giduso ni City Councilor Jan Vincent Dela Serna, nagtumong sa pagpalig-on sa pagdumala sa operasyon sa firing ranges tungod sa mga kabalaka sa kaluwasan sa publiko, mga stray bullet, sobra nga kasaba, ug dili awtorisadong paggamit sa armas.
Matod ni Dela Serna sa interbyu sa SunStar Cebu niadtong Lunes, Agusto 24, 2026, napukaw ang maong kabalaka human sa mga taho nga adunay mga stray bullet nga niigo sa mga panimalay sa Barangay Canjulao sa duha o tulo ka managlahing higayon.
Ang maong problema giingong nalambigit, sa usa ka bahin, sa backstop sa firing range nga gikataho nga ubos ra kaayo aron hustong mapugngan ang mga bala.
“Naplano nga ato na ning estriktuhon kay what if sa sunod na pud, naa na pu’y mahitabo niya naa na gyu’y maigo ba. Atong likayan,” matod ni Dela Serna.
Ubos sa gisugyot nga ordinansa, ang tanang operator sa firing range kinahanglan makakuha ug magmintinar sa balido nga PNP-Firearms and Explosives Office firing range accreditation sa dili pa sila maka-operate sa ilang pasilidad.
Upat ka accredited firing ranges ang anaa karon sa Lapu-Lapu City, diin duha niini pribadong gipadagan ug duha ang gipadagan sa gobiyerno. Ang pribadong firing ranges nahimutang sa Barangay Agus ug sulod sa usa ka pribadong resort sa Barangay Marigondon, samtang ang firing ranges nga gipadagan sa gobiyerno nahimutang sa Naval Forces Central ug sa Mactan Air Base.
Gilatid sab sa ordinansa nga walay business o mayor’s permit nga iisyu o i-renew gawas kon adunay kasamtangang inspection report ug clearance gikan sa local chief of police ug sa City Bureau of Fire Protection.
Gikinahanglan sab nga mosunod ang mga firing range sa engineering ug ballistic safety standards. / DPC