Nagtuo ang 24 anyos nga dalaga nga taga dakbayan sa Lapu-Lapu nga tinuod ang investment sa Facebook apan gilimas ra diay ang iyang kwarta nga moabot sa P76,000 nga iyang gitigom sulod sa duha ka tuig aron ipalit unta og mahalon nga cellphone.
Nagpatabang sa DyHP si alyas Elle, uban sa iyang hinigugma nga tinun-an sa Criminology sa pamasin nga mabalik ang iyang kwarta nga nahatag sa scammer.
Matod ni Elle nga niadtong Hulyo 10, 2025, ni-chat niya si Patricia Balagtas og giingnan siya nga moapil sa investment diin ang iyang kwarta motubo og 60 porsyento sa pipila lang ka gutlo.
Gitug-an ni Elle nga dugay na niyang gitigom ang maong kantidad samtang nagtungha siya sa usa ka dakong unibersidad sa kursong Bachelor of Science in Customs Administration.
Tungod sa gihaylo kaniya, misugot siya nga mo-invest apan ginagmay lang ang iyang ipagawas nga kwarta.
Giingnan siya ni Balagtas nga i-follow si Shanaiah Francisco sa iyang Telegram account kay kini matod pa ang mohatag sa sweldo kung makatuman siya sa mga bulohaton nga isangon kaniya.
Gipapil-up si Elle sa dokumento diin tanan nga detalye iyang gihatag lakip na ang iyang GCash number ug gihatagan siya og unang sweldo nga P120.
Nagtuo si Elle nga tinuod ang iyang nasudlan nga investment kay na depositohan dayon ang iyang Gcash og kwarta.
Gipasabot usab siya ni Shanaiah nga mosalmot sa tanang welfare event aron paspas nga motubo ang iyang kwarta.
Sa unang welfare event niadtong Hulyo 12, 2025, nag-deposito siya og P1,200 ug sulod lang sa pila ka gutlo nabalikan dayon ang iyang GCash og P1,600.
Gipasabot siya ni Shanaiah nga gikan sa 30 porsyento nga naginansya modoble na kini sa sunod nga welfare event.
Giapil na siya sa usa ka group chat nga nakapangalan sa MP Digital nga duna lamay lima ka membro ug ang upat pulos mipahibawo nga nakuha na nila ang ilang ginansya sa ilang gi invest og dinagko ang cash nga ilang nadawat.
Ang upat nagpadala pa og hulagway nga naka shopping sila og mga mahalon nga gadget ug mga sapot.
Tuod man, mideposito na usab si Elle og P1,600 nianang pagka-gabii apan giingnan siya sa ilang handler nga dili na kini available kay puno na ang slot ug ang open na lang mao ang P3,500.
Dali nga mideposito si Elle sa maong kantidad apan human niya ma deposito gipahibawo sila nga sa buntag na sa Hulyo 13, 2025 ipadayon tungod kay natulog na ang handler niini.
Tungod kay na excited na si Elle nga makakuha og daku nga kantidad pagka ugma niana iyang gisayo sa pag abli ang iyang messenger apan giingnan na usab siya nga padugangan og P2,500 ang iyang nadeposito nga kwarta aron daku ang mabalik kaniya.
Human mahatag ang kwarta gihatagan na usab siya og task sama sa pag like ug follow sa ubang mga page ug pag-imbitar sa ubang mga Facebook friends ug kinahanglan na usab siya nga modeposito og P20,000 bisan wala pa niya makuha ang ginansya sa P6,000.
Tungod kay giapura siya sa ilang handler wala na siya maka-hunahuna nga gi scam na diay siya niini ug gihatag na usab niya ang P20,000.
Gisunod niya ang pag deposit sa P20,000 sa GCash aron maka P50,000 siya apan gihatagan na usab siya og order nga balor P50,000 wala pa gani niya makuha ang gisaad nga kwarta nga mobalik niya.
Dinhi na siya nataranta kay padung na nga mahurot ang iyang tinigom hangtod naka hukom kini nga mo loan nalang og kwarta diha sa loan app sa Facebook.
Giingnan matod pa siya sa handler nga kinahanglan na ang kwarta kay siya na lang ang wala maka-deposito ug iya gyud kini nga napadala sa GCash.
Dinhi na siya nakamata sa kamatuoran sa dihang giingnan siya sa iyang hinigugma nga na scam siya kay wala na mobalik ang iyang kwarta.
Misamot pa ang iyang pagtuo nga nailad siya sa dihang gipangayoan na usab siya og balor P100,000 alang sa laing task ug ang balik niini P200,000 na.
Nakahukom na si Elle nga magpatabang sa DyHP ug idangop sa Cybercrime Unit 7 aron madakpan ang nangilad kaniya. /
