Mosagubang og malisod nga tahas si Filipino Elmo Traya sa iyang pagpakigbatok ni kanhi world title challenger Thai Apinun Khongsong alang sa inilugay sa bakanteng Asian Boxing Federation (ABF) super welterweight title karong Agusto 30, 2025, sa World Siam Stadium sa Bangkok, Thailand.
Si Traya, 30, kinsa kanhi sakop sa nabungkag nga ALA boxing stable sa Sugbo, mosuway pagposte sa ikaupat niyang sunodsunod nga kadaugan.
Sa labing ulahi niyang tulo ka mga away, gipilde ni Traya si Chinese Wei Wei Liu pinaagi sa splits decision ug gisundan kini niya og duha ka sunodsunod nga 1st round knockouts nga kadaugan batok sa mga kababayan ni Khongsong nga sila si Vachayan Khamon ug Sitthidet Banti.
Si Traya adunay 15-5, 10KOs nga rekord samtang si Khongsong adunay 25-4, 21KOs nga baraha. / EKA