Ex-ALA fighter Santisima moaway sa “Bakbakan sa Masbate 2” card

Ex-ALA fighter Santisima moaway
sa “Bakbakan sa Masbate 2” card
Boxing SunStar File photo

Sa ikaduha pa lang nilang boxing card, ang ATK Promotions ni Masbate Governor Antonio Kho mopasiugda na og usa ka international event unya langkuban kini og lima ka title fights.

Gitumbok mao ang ikaduhang edisyon sa “Bakbakan sa Masbate” boxing series nga ipahigayon karong Hunyo 22, 2024 sa Masbate Lagoon sa Matayum, Cataingan.

Nagkanayon si ATK Promotions manager Ansbert “Bobo” Son nga moaway sa main event sa promosyon mao ang kanhi sakop sa nabungkag nga ALA Promotions sa Sugbo nga si Jeo “Santino” Santisima, kinsa lumad nga taga Masbate.

Makigbatok si Santisima ni Arnon Yupang sa Thailand alang sa inilugay sa World Boxing Council (WBC) Asia Continental super featherweight title.

Si Santisima, kinsa kanhi World Boxing Organization (WBO) Oriental super bantamweight champion, naggunit og 23-7, 19KOs nga rekord samtang si Yupang adunay 14-4, 5KOs nga baraha.

Ang manghod ni Jeo nga si Alex Santisima, Jr. (8-1, 2KOs) mopakita sab og aksiyon batok kang Jastine “Philippine Tiger” Darap (11-5, 7KOs) alang sa World Boxing Foundation (WBF) Australasian super flyweight title.

Magbinukbokay sab sila si Jon Jon “Wolverine” Estrada (18-12-1, 14KOs) sa Elorde Fight Team sa Sucat, Parañaque City ni WBC Asian Silver flyweight champion Michael “Hot N’ Spicy” Dasmarinas (34-3-2, 24KOs) sa CamSur Sports Academy alang sa bakanteng Philippine featherweight belt.

Magsangka sab sila si Esneth “Hard Hitter” Domingo (19-2, 11KOs) sa ZIP Samman Boxing batok Nutlai Lalbiakkima (6-1, 5KOs) sa India alang sa inilugay sa WBC Asia flyweight title.

Ang katapusang title fight mao ang tali nila ni Ben “Sniper Ben Fairtex” Ligas (16-4, 10KOs) sa Elorde Stable batok Alvin Camique (8-2, 3KOs) sa Amoy Gym, kinsa mag-ilog sa WBF International super flyweight belt.

Aduna pa’y laing lima ka mga engkuwentro ang masaksihan sa promosyon. / ESL

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph