Gipadayag ni kanhi World Boxing Organization (WBO) Oriental super bantamweight champion Jeo “Santino” Santisima nga grabe ang iyang kahinam nga moaway atubangan sa iyang katagilungsod sa Masbate.
Niini, gipasalig ni Santisima nga morehistro siya og makapaukyab nga kadaugan sa iyang pagpakigbatok kang Thai champion Arnon Yupang (14-4, 5KOs) alang sa inilugay World Boxing Council (WBC) Asia Continental super featherweight title karong Hunyo 22, 2024 sa Masbate Lagoon sa Matayum, Cataingan.
Ang away maoy main event sa “Bakbakan sa Masbate 2” boxing card nga gipasiugdahan sa ATK Promotions ni Gobernador Antonio Kho.
Si Santisima, kinsa lumad nga taga lungsod sa Aroroy, Masbate, nagkanayon nga siyento porsiyento siyang andam nga mohamag ning awaya.
Giawhag sa kanhi sakop sa nabungkag nga ALA stable sa Sugbo ang iyang mga katagilungsod nga suportahan siya ning maong tahas.
Gipasalig ni Santisima nga buhaton niya ang tanan aron makahatag og garbo sa Masbate.
Si Santisima adunay 23-7, 19KOs nga rekord samtang si Yupang naghupot og 14-4, 5KOs nga baraha.
Sa laing gikahinamang away, ang manghod ni Santisima nga si Alex (8-1, 2KOs) makigbatok kang Jastine “Philippine Tiger” Darap (11-5, 7KOs) alang inilugay sa World Boxing Foundation (WBF) Australsian super flyweight title.
Magbinukbokay sab sila si Jon Jon “Wolverine” Estrada (18-12-1, 14KOs) sa Elorde Fight Team sa Sucat, Parañaque City batok WBC Asian Silver flyweight champion Michael “Hot N’ Spicy” Dasmarinas (34-3-2, 24KOs) sa CamSur Sports Academy alang sa bakanting Philippine featherweight title.
Magsangka sab sila si Esneth “Hard Hitter” Domingo (19-2, 11KOs) sa ZIP Samman Boxing batok Nutlai Lalbiakkima (6-1, 5KOs) sa India alang sa WBC Asia flyweight title ug Ben “Sniper Ben Fairtex” Ligas (16-4, 10KOs) sa Elorde Stable kontra Alvin Camique (8-2, 3KOs) sa Amoy Gym sa GenSan alang sa kampiyonato sa WBF International super flyweight category. / ESL