Ex-convict nga nagbalik-balik na sa bilangguan ang nadakpan na sab uban sa iyang konsabo nga babaye atol sa buy-bust sa Inayawan Police Station alas 11:50 sa gabii, Lunes, Hulyo 28, 2025, sa Sitio Kanipaan, Barangay Basak Pardo, Dakbayan sa Sugbo.
Ang dinakpan giila nga si Ricardo AbaƱo Tabar alyas Butchoy ug Marilyn Tabulong Monida alyas Agting pulos hingkod nga molupyo sa maong dapit.
Nakuha sa mga operatiba ang mga putos sa gituohang shabu nga motimbang sa 85 gramos nga mobalor ang tanan sa P578,000. Ang kapulisan nakadawat og tawag sa telepono nga dunay namaligya'g ilegal nga drugas sa maong dapit hinungdan nga gipaubos sa surveillance ug monitoring.
Human masuta ang kasayuran nga tinuod, gihimo sa kapulisan ang operasyon nga niresulta sa ilang pagkasikop.
Giingong si alyas Agting ang nadakpan na niadtong Enero 2025 apan nakagawas pagka sunod buwan ubos sa probation samtang si Alyas Butchoy nadakpan na sab niadtong 2016 ug nakagawas pagka 2021 sa kaso gihapon sa ilegal nga drugas.
Base sa impormasyon ang mga suspek maoy nagsilbing bodegero sa suplay sa ilegal nga drugas ug makabaligya siya og 100 gramos sa shabu matag semana. / AYB