Ex-con gibirahan sa pagkatug; halin sa drugas wa i-remit?

Cebu City map.
Cebu City map.

Wala makamata sa iyang pagkatulog ang giila nga ex-convict human pusila alas 2:30 sa kaadlawon sa Lunes, Mayo 6, 2024, sa Sit­yo San Juan Puntod 1, Brgy. Mambaling, dakbayan sa Sugbo.

Si Dave Sardido, hingkod ang panuigon, ug kanhi priso, ang namatay human nakaangko’g samad pinusilan sa ulo.

Si Sardido diha nakatagpilaw sud sa E-trike sa iyang silingan nga giparada daplin sa dalan. Atol niining pagsuwat, wa pa mailhi sa kapulisan ang giingong duha ka suspetsado nga mipatay sa biktima.

Si Police Major John Lynbert Yango, hepe sa Mambaling Police Station nga nahinabi sa Superbalita Cebu, nagkana­yon nga ang kalambigitan sa drugas ang gituohang motibo sa krimen.

Base sa nahipos nga kasayuran nasuta nga adunay wala mabayri nga utang sa drugas ang biktima.

Matod pa dako-dako nga kantidad hinungdan nga dili layo ang posibilidad gipaningil kini.

Hinuon dunay duha ka person of interest nga ilang gisu­bay ang kapulisan.

Ang mga tawo sa dapit pulos ambot sa ilang pamahayag ug igo lang sila nakabati sa sipang buto sa armas.

Alas 6:20 sa buntag na nasayran human makit-i ang biktima nga nagkadugo na.

Matud ni Yango, nga ang biktima nakagawas sa bilanggoan Enero 2023 tungod sa kaso sa drugas.

Nahibaw-an sa kapulisan nga ang biktima nagpadayon sa illegal nga kalihukan.

Usa ka ginganlag “Jun” dili tinuod pangalan nga nahinabi sa Superbalita Cebu, niasoy nga nagduwa siyag online game sa internetan sa duol diin nakadungog siya og buto sa pagtuo nga rebentador.

Si Jerrylyre Calma, mang­hud sa biktima, mibutyag nga gibadlong na nila si Sardido, apan wala gyud mopatuo. / GPL

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph