Patay ang usa ka 47 anyos nga ex-convict human gipusil alas 11:45 sa gabii, Huwebes, Enero 16, 2025 sa Sitio Lahing-lahing 2, Barangay Mabolo sa Dakbayan sa Sugbo.
Ang biktima giila nga si Eugene Gabato Tapipe, 47, residente sa Barangay Talamban sa dakbayan sa Sugbo nga nakaangkon og samad sa dughan ug sa kilid sa lawas niini.
Sa imbestigasyon sa Mabolo Police Station nga niangkas ang biktima sa motorsiko sa iyang higala ug niadto sila sa maong lugar apan sa ilang pag-abot sa MJ. Cuenco ug padung na mosulod sa Sitio Lahing-lahing, kalit lang sila nga gipamusil sa usa ka lalaki nga nagsul-ob og gray nga t-shirt nga naka-bonnet ug dayong sibat.
Sigun sa mga saksi nga nakapadagan pa ang drayber sa motorsiklo og pila ka metros ug dayong katagak sa angkas niini nga samaran na.
Nipasutoy pagpadagan ang drayber biniyaan ang biktima ug nilahos matod pa kini sa barangay hall sa Mabolo nga nagpahibawo nga dunay gipusil apan wala na gyud kini mobalik.
Tungod niini, matod ni Police Major Romeo Caacoy Jr., hepe sa Mabolo Police Station, nga ila na karon nga gipangita ang higala sa biktima ug ilhon kung kinsa kini tungod kay nakapaduda ang lihok niini.
Nagduda usab si Caacoy nga dunay kasayuran ang suspetsado nga moabot ang biktima uban sa iyang higala tungod kay base sa pamahayag sa mga saksi nga taod-taod na nga nakit-an ang suspetsado sa lugar nga daw sa dunay gipaabot.
"Base sa mga circumstances no timing man kaayo, so nay knowledge ang gunman nga moagi gyud didto anang orasa ang biktima, kining biktima dili man ni taga diha," matod ni Caacoy.
Gitug-an ni Caacoy nga niadtong 2015 nadakpan na sa Mabolo police station si Tapipe sa kaso sa illegal nga drugas ug armas apan sa dihang naka gawas nabalik na usab siya sa bilangoan pagka 2022 human madakpan sa Mambaling police station sa kaso gihapon sa illegal nga drugas.
Subay niini, gisubay karon sa Mabolo Police Station nga dunay kalambigitan sa illegal nga drugas ang motibo sa maong krimen.
Nakakuhag tulo ka basiyo sa bala sa kalibe 45 nga pistola ang mga sakop sa Scene of the Crime Operation (Soco) sa dapit.
Gipangsubay na usab sa kapulisan ang mga kuha sa CCTV camera sa dapit dungan sa paglusad og manhunt operation sa ilang person of interest. / AYB