USA ka senior citizen nga ex-convict naangol human gibunal-bunalan og kahoy sa iyang silingan nga usa pud ka ex-convict alas 6:20 sa gabii, Dominggo, Hulyo 20, 2025, sa Sitio Datag, Barangay El Pardo, Lungsod sa Boljoon.
Ang biktima nga si Democrito Linamas, 73-anyos, mag-uuma, ex-convict sa kasong murder gidala sa tambalanan sa Lungsod sa Oslob human nasiak ang ulo niini. Nasikop ra sab sa kapulisan ang suspek nga si Michael Lawas Romaguera, 43, ulitawo, mag-uuma, ex-convict sa kasong parricide.
Matod ni Police Master Sergeant Erwin Oyao, imbestigador sa Boljoon Police Station nga nahinabi sa Superbalita Cebu, nga ang biktima gikan nga mitambong og meeting sa senior citizen sa ilang lugar.
Samtang ang suspek hubog gikan nga nagtagay uban sa pag-umangkon sa biktima.
Padulong na mopauli ang suspek dihang iyang nasugatan ang biktima nga niresulta sa ilang panaglalis. Tungod niini, gibunal-bunalan og kahoy sa suspek ang ulo ni Linamas kinsa nawad-an og panimuot ug gidala sa tambalanan.
Matod ni Oyao nga karaang panagbangi ang hinungdan.
“Kining biktima duha ang napatay paryente aning suspek. Mao nga dugay na ni silang walay maayong buot,” sumala Oyao.
Samtàng ang suspek napriso sa kasong parricide human gipatay ang kaugalingon amahan. / GPL