Ex-convict nga nahimong mayor sa selda sa prisuhan nga taga Negros Oriental, niadto lang 2024 nakagawas sa kaso sa ilegal nga drugas ang nadakpan sa gilusad nga buy-bust sa Minglanilla Municipal Police Station alas 9:57 sa gabii, Miyerkules, Hulyo 30, 2025, sa subdivision sa Barangay Tungkil, Lungsod sa Minglanilla.
Ang nasikop giila nga si Joven Abjelina Reso, 39, taga Barangay Tandayag, Amlan, Negros Oriental.
Nasakmit sa mga sakop sa Station Drug Enforcement Unit sa Minglanilla ang napulo ka bulto sa gituohang shabu nga motimbang og 1,025 gramos nga dunay standard drug price nga P6,970,000.
Lakip sa nasakmit ang buy-bust money ug ang mga ebidensya sama sa mga putos sa gituohang shabu nga giduso sa Cebu Provincial Forensic Unit 7.
Matod ni Police Major Arieza Otida ang hepe sa Minglanilla Municipal Police Station nga dul-an sa usa ka buwan nila nga gi-monitor si Reso dihang ilang nadawat ang kasayuran nga dunay tighulog og shabu nga dinaghan sa Barangay Tungkil.
Sa dihang nakuha ang tanang impormasyon ug kon kanus-a mo-deliver og suplay sa ilegal nga drugas ang suspek, gilusad dayon ang buy-bust.
Gitug-an ni Otida nga nadakpan na si Reso sa kaso sa ilegal nga drugas niadtong 2009 ug nabilanggo sa Dumaguete City Jail sud sa pito ka tuig ug niadtong 2024 nakagawas.
Sa iyang paglaya, nibalik ni sa iyang naandan nga trabaho diin siya ang modawat sa suplay sa ilegal nga drugas gikan sa Abuyog, Leyte nga ipadala paingon sa Dakbayan sa Dumaguete ug iya sab ning ibyahe paingon sa Sugbo.
Ang iyang area sa distribution mao ang tibuok southern part sa Probinsiya sa Sugbo ug sa Siyudad sa Sugbo.
Kalapasan sa Section 5 ug 11, Article II, Republic Act 9165 ang ipasaka nga kaso batok sa suspek. / AYB