Nadakpan ang usa ka ex-convict sa kaso sa ilegal nga drugas sa Labangon Police Station human nakuhai og armas sa sulod sa iyang balay atol sa pag-serve sa search warrant sa kapulisan, alas 9:20 sa gabii, Lunes, Agusto 19, 2024.
Ang suspek giila nga si Ruben Panugaling Geloca, 48, residente sa Sitio Bugnay 2, Barangay Labangon, Siyudad sa Sugbo.
Ang Labangon Police Station sa pagpangulo sa hepe nga si Police Major Eraño Regidor armado kini og search warrant nga giluwatan ni Judge Marlon Moneva, ang presiding judge sa Regional Trial Court (RTC) Branch 74 sa dakbayan sa Sugbo batok kang Geloca.
Nakuha sa sulod sa balay sa subject sa search warrant mao ang kalibre .38 ug duha ka bala niini nga naa sa sulod sa cylinder.
Matod ni Regidor nga kanunay na nga maalarma sa mga polis ang maong suspek tungod sa pagdaladala niinig armas.
Nadakpan kaniadto si Geloca human sa buy-bust sa kapulisan diin nag-atubang siya'g kaso sa kalapasan sa Section 5 ug 11, Section II, Republic Act (RA) 9165 o Comprehensive Dangerous Drugs Act of 2002 apan giingong nakagawas kini sa bilanggoan human sa pagsilbi sa iyang silot. / AYB