Lalaki nga nagduwa og scatter sulod sa usa ka kompyuteran sa Block 1 Street, Barangay Suba, Dakbayan sa Sugbo giulo sa pagpusil sa duha ka wala pa mailhing mamumuno alas 4:15 sa buntag, Martes, Hulyo 15, 2025.
Ang biktima giila nga si Ricardo Igot, 46, ex-convict nga nagpuyo ra sab sa maong lugar nga nakaangkon og samad pinusilan sa ulo sa wala pa matino nga kalibre sa armas.
Matod ni Police Lieutenant Colonel Maria Theresa Macatangay deputy city director for operation sa Cebu City Police Office (CCPO) nga samtang nagduwa'g scatter ang biktima kalit lang nga naabot ang duha ka mamumuno armado og pistola.
Ang mga residente na sa dapit ang nagdala sa biktima sa Cebu City Medical Center apan gideklarar sa mga doktor nga dead on arrival.
Gibutyag ni Macatangay nga si Igot nadakpan na niadtong Pebrero 2023 sa kalapasan sa Section 11, Article II, Republic Act 9165 o possession of illegal drugs apan nakagawas sa miaging tuig.
Human nakagawas sa prisohan, nagpadayon sa iyang naandan nga trabaho ang biktima nga mao ang pagpamaligya sa ilegal nga drugas.
Usa sa mga impormasyon nga nakuha sa CCPO nga dakong utang sa shabu ang motibo sa maong krimen ug ang iyang giutangan nasuko sa dihang wala na kini makabayad.
Duna nay nakuha nga kopya sa CCTV camera ang mga imbestigador sa CCPO ug nitakdo kini sa nilabay nga kaso sa pagpamusil.
Ang kanhi kauban niini ang nadakpan na sa mga operation sa kapulisan ug gitumbok nga siya ang driver sa usa sa mga nahitabong shooting incident sa Dakbayan sa Sugbo nga wala lang una nganli sa kapulisan.
Giingong gisaaran sa biktima ang iyang supplier sa illegal drugs nga mobayad apan wala siya motuman ug gituohang tungod niini, siya gipatay. / AYB