Gidakop ang usa ka ex-convict nga sabog human niya gigukod ug gisuwayan og dunggab ang usa ka civil engineer sa Sitio Pagnahian, Barangay Sonog, San Francisco, Camotes niadtong mga alas 2:30 sa hapon sa Miyerkules, Agusto 6, 2025.
Ang suspek giila nga si Francisco Bantiles Sampan Jr., giingong nakasinati og kalibog sa iyang hunahuna.
Sumala ni Police Major Vincent Zozobrado sa San Francisco Police Station, nanawag og police assistance ang live-in partner ni Sampan nga si Rubelyn human nagkagubot.
Ang suspek nagdala og ice pick ug nisuway sa pagdunggab kang Candido Soria Ruben Jr., 48, usa ka civil engineer ug higala ni Rubelyn.
Pinaagi sa hot pursuit operation, nadakpan si Sampan ug nasakmit ang usa ka improvised steel ice pick, P590 nga cash, duha ka improvised lighters, ug pito ka sachet nga gituohang shabu.
Matod sa suspek, nagdamgo siya nga gitigbas siya sa engineer maong iyang giatake. / GPL