Usa ka ex-convict sa kaso sa gidiling drugas, nasikop og balik human nasakpan nga nangawat og chocolates sa usa ka dakong tindahan sa Barangay Basak San Nicolas, dakbayan sa Sugbo, alas 6:20 sa gabii, Sabado, Oktubre 12, 2024.
Napusasan si Alex Ramirez Jimenez, 42, ulitawo, taga McArthur Blvd., Barangay Tinago, dakbayan sa Sugbo.
Ang nakasikop mao ang mga gwardiya sa tindahan pinangulohan ni Jesus Velita, 40, security team leader sa tindahan, taga San Sitio Ananada, Brgy. Quiot, dakbayan sa Sugbo nga ni-turn over sa suspek ngadto sa Mambaling Police Station.
Si Jimenez nag-shopping apan nga wala moagi sa counter apan nabantayan na kini sa mga gwardiya hinungdan nga napusasan.
Nakuha gikan sa iyang posisyon ang siyam ka buok chocolates nga mobalor sa P1,575.
Sa laing bahin, napusasan usab ang usa ka lalaki kay nangawat sulod sa dakong tindahan sa Brgy. 3, lungsod sa Tuburan, alas 2:00 sa hapon, Sabado, Oktubre 12, 2024.
Si Epefanio Itang Mahusay, 50, ulitawo, taga Brgy. Dalid, lungsod sa Tabuelan, napusasan sa mga guwardiya.
Si Police Lt. Col. Glenn Hife, hepe sa Tuburan Police Station nga nahinabi sa Superbalita Cebu, nagkanayon nga ang suspek kunuhay mag-shopping atol nga dunay promo o sale sa tindahan pero nigawas kini sa tindahan wala moagi sa counter.
Nabantayan sa mga gwardiya dihang girekisa, nakuha gikan sa iyang posisyon ang mga kinawat nga naglangkob sa walo ka sachets sa orange juice, mga mahalong tsinelas ug face towel diin ang tanan mobalor og P1,074.55.
Matod ni Hife, ang suspek migamit kinig “girdle* diin didto gitago ang mga kinawat. / GPL