Nitugpa og balik sa bilanggoan ang usa ka ex-convict human nasakpan sa mga kapulisan nga nagdala og armas nga dili lisensyado mga alas 7:00 pasado sa gabii, Sabado, Agusto 22, 2026 sa Purok Tambis 1, Barangay Yati, lungsod sa Liloan.
Ang naposasan mao si Teomark Nocos, 37 anyos, nagtrabaho isip construction worker, ug residente sa Barangay Basak, Compostela, Cebu.
Base sa imbestigasyon sa Liloan Police Station, nakadawat sila og tawag gikan sa usa ka residente nga dunay armadong lalaki.
Giadto dayon sa kapulisan ang lugar ug ilang naabtan si Nocos, kinsa mitugma sa paghulagway sa mitawag nga residente.
Sa pagduol sa mga otoridad ni Nocos, matud pa nga namatikdan nila nga dunay nagburot sa kilid niini hinungdan nga ilang gipaisa ang sanina.
Ug didto nakita ang 9mm nga pistola.
Dihang gipangayoan ang suspek og mga dokumento sa maong aramas, wala kini nakapakita hinungdan nga gidakop.
Gawas sa armas, narekober sa kapulisan ang usa ka 10 steel magazine, unom ka buhing bala, ug usa ka inner holster.
Kasong kalapasan sa Republic Act No. 10591, kon Comprehensive Firearms and Ammunition Regulation Act ang atubangon sa suspek. / JDG
