Usa ka ex-convict ug usa ka delivery rider ang nakuhaan og tagsa ka kilo sa gituohang shabu sa managlahi nga buy-bust sa Dakbayan sa Lapu-Lapu ug siyudad sa Mandaue sa Sabado, Mayo 3, 2025.
Ang usa sa mga suspek giila ni PDEA 7 acting regional director Alex Tablate nga si alyas Daryl, 30, walay trabaho nga taga Barangay Guadalupe sa Dakbayan sa Sugbo, maoy unang nadakpan sa alas 4:25 sa hapon sa Sitio Camansi, Barangay Pajo sa dakbayan sa Lapu-Lapu.
Nasakmit sa mga operatiba ang usa ka vacuum-sealed nga transparent plastic nga dunay sulod sa gituohang shabu nga motimbang sa 1,000 grams nga dunay estimated average market value nga P6.8 milyunes, buy-bust money ug cellphone.
Matod ni Leia Alcantara, information officer sa Philippine Drug Enforcement Agency (PDEA) 7, moabot sa upat ka bulan nila nga gipaubos sa case build up si alyas Daryl human sila makadawat og impormasyon gikan sa ilang confidential informant.
Base sa ilang nakuha nga kasayuran, makabaligya si Daryl og lima ka kilos nga ginadiling drugas matag buwan gikan sa iyang supplier.
Niadtong 2014, nabilanggo si Daryl sa kaso gihapon sa paghupot sa illegal nga drugas ug nakagawas kini pagka Disyembre 2024.
Ang mga nakuhang ebidensya giduso na sa PDEA 7 Laboratory alang sa himuon nga chemical analysis ug proper disposition.
Pagka alas 11:08 sa gabii sa Sabado sa Sitio Sun-ok, Purok Tambis, Barangay Umapad sa Dakbayan sa Mandaue, nasikop usab sa mga sakop sa City Intelligence Unit sa Mandaue City Police Office ang laing suspek nga si alyas Jerry, 33, Angkas driver nga taga Zone Sibuyas, Barangay Paknaan sa maong dakbayan.
Nakuha gikan kaniya ang binulto sa gituohang shabu nga motimbang sa usa ka kilo nga dunay balor nga P6.8 million.
Usa ka semana nga gipaubos sa monitoring ang maong suspek human migawas ang iyang pangalan sa mga milabay nga dakop sa kapulisan.
Giingong makabaligya si Jerry og 300 ngadto sa 500 gramos nga shabu matag semana gikan sa iyang supplier nga usa ka piniriso.
Ang iyang areas of distribution mao ang mga siyudad sa Mandaue, Lapu-Lapu ug Sugbo.
Giandam na ang kasong kalapasan sa Section 5, Article II, Republic Act 9165 nga ipasaka sa PDEA 7 batok sa mga suspek. / AYB