Napalgang patay nga gilabay sa kasagbotan sa Purok Kawayan, Barangay Jaclupan, Dakbayan sa Talisay, alas 7:30 sa buntag, Lunes, Oktubre 28, 2024.
Ang biktima giila nga si Ramesis ‘Cocoy’ Gabutan, 27, taga Purok Abocado sa Jaclopan, ug bag-o lang nakagawas sa bilanggoan sa kasong illegal drugs.
Sumala sa kapulisan, ang biktima giila sa dapit nga usa ka notado nga kawatan ug tulisan.
Ang Talisay City Police Station nakadawat og tawag sa ilang hotline nga dunay tawo nga napalgan nga wala nay kinabuhi sa maong lugar.
Dali nila kini nga girespondehan ug ilang naabtan nga nagbuy-od na kini sa kasagbotan nga dunay samad pinusilan sa dughan ug kilid niini nga niresulta sa iyang kamatayon.
Si Pipito Nulla, barangay tanod sa lugar, maoy unang nakaabot nga awtoridad sa dapit, alas 6:30 sa buntag, human gipahibalo sila sa mga residente bahin sa patay.
Matod ni Police Lieutenant Colonel Epream Paguyod, hepe sa Talisay City Police Station, nga ila pang gisubay kung kinsa ang responsabli sa krimen.
Base sa ilang nakuha nga impormasyon nga naila nga notadong tulisan ang biktima sa dapit ug nabilanggo na sa kaso sa ilegal nga drugas samtang nadakpan pag-usab sa kaso sa illegal gambling.
Gitan-aw sa kapulisan ang tanang anggulo sa krimen lakip na ang motibo ug ang mga imbestigador gimanduan sa hepe nga palawman ang ilang imbestigasyon.
“Right we are establishing kung ano man yung mga motives kung ano ang ginamit sa element sa crime,” matod ni Paguyod.
Wala pay matumbok ang kapulisan kung kinsa ang naghimo sa krimen nga tungod ani gipangsusi pa ang mga residente sa dapit kung duna bay nakakita sa maong panghitabo.
Ang inahan sa biktima nga si Anecita Gabutan misinggit og hustisya sa kamatayon sa iyang anak.
Matod niya nga kung nakasala man ang iyang anak dili lang unta patyon ug labing maayo gipabilanggo na lang unta kini.
“Ginuo ko, tabangi ko.. mangayo gyud ko'g hustisya sa akong anak nganong gipatay. Kon nakasala man, ngano man patyon man, iya lang ta to gipapriso. Nganong way nakahibalo dinhi nga naa man diha daghang amigo diri” awhag ni Anecita.
Nasagmuyo ang inahan sanglit walay bisan usa nga mibarog nga ilang silingan nga motug-an kung kinsa ang naghimo sa krimen. /AYB