PATAY na nga nadangat sa Cebu City Medical Center ang usa ka 33-anyos nga e-bike driver human pusila sa riding in tandem, alas 9:58 sa buntag sa Domingo, Hunyo 22, 2025, sa B. Aranas, Barangay San Nicolas Proper, Dakbayan sa Sugbo.
Ang biktima giila nga si Ronnie Aya-ay Lawas, 33, taga Peace Valley, Barangay Lahug apan kasamtangan nga nagpuyo sa Sitio Kastilaan, Barangay Ermita sa Dakbayan sa Sugbo.
Sa imbestigasyon sa Sawang Calero police station 6 sa Cebu City Police Office nga samtang nagmaneho sa iyang e-bike ang biktima, iyang nakasugat ang usa ka motor diin ang angkas niini ang kalit lang nga nikuha og armas ug dayong pusil sa biktima.
Nikagar ang unang pagkablit sa suspek ug sa ikaduha na kini nibuto unya giusban pa sa duha ka mga higayon.
Human sa pagpamusil, dali nga nisibat ang mga suspek palayo sa dapit samtang ang biktima nangayo og tabang sa mga tawo nga naa sa palibot nga nakakita sa insidente.
Dali nga niresponde ang mga polis nga niadtong tungora nag-foot patrol duol sa nahitaboan ug ilang naabtan ang biktima nga nag-akbo sa iyang e-bike nga nagkadugo.
Ila dayon ning gidala sa tambalanan human nasuta nga nagginhawa pa apan gideklarar siya nga dead on arrival sa ospital.
Sa gihimong imbestigasyon sa Sawang Calero police station 6, nasuta nga ang biktima bag-o lang nakagawas gikan sa Abuyog Penal Farm sa kasong murder ug paghupot og armas nga walay lisensya. Nakakuha na og kopya sa CCTV camera ang mga imbestigador diin ila nang gipangsubay kon asa nipaingon ang mga suspek. / AYB