NAPUSASAN ang usa ka ex-convict human ma buy-bust sa mga sakop sa Provincial Intelligence Unit/Provincial Drug Enforcement Unit sa Cebu Police Provincial Office alas 6:22 sa gabii, Hulyo 3, 2025, sa Purok 5, Barangay Dapitan Lungsod sa Cordova.
Ang nadakpan giila nga si Erwin Jasper Sumalinog Wahing, 46, taga Purok 7 sa maong barangay.
Nasakmit sa mga operatiba ang mga pinakete sa gituohang shabu nga motimbang sa 250 gramos nga dunay standard drug price nga P1.7 milyunes.
Sigon sa usa sa mga personnel sa PIU sa CPPO nga nakadawat sila og report gikan sa kasaligang tinubdan nga nibalik sa iyang pagpamaligya sa ilegal nga drugas ang suspek.
Tungod niini, ilang gipaubos sa monitoring sulod sa usa ka semana ug sa dihang nasuta nga tinuod ang impormasyon giplano dayon ang buy-bust sa pakig-alayon sa Philippine Drug Enforcement Agency 7.
Giingong makabaligya si Wahing og 100 grams nga shabu matag semana diin ang iyang area sa distribution mao ang tibuok Siyudad sa Lapu-Lapu, Cordova, Consolacion, Liloan, ug Dakbayan sa Sugbo.
Gibutyag sa suspek nga siya ang gihimong bodegero sa iyang contact sa suplay sa ilegal nga drugas ug siya sab ang mo-deliver sa ilang customer.
Giandam na ang kasong kalapasan sa Section 5 ug 11, Article II, Republic Act 9165 nga ipasaka batok sa suspek. / AYB