Giingon nga sinaligan sa usa ka dako’ng drug personality nga naa sa sulod sa bilanggoan nadakpan sa gilusad nga buy-bust sa mga sakop sa Regional Drug Enforcement Unit (RPDEU) sa Police Regional Office (PRO 7) sa alas 8:30 sa gabii sa Lunes, Enero 22, 2023 sa dalan Cabahug, Brgy. Mabolo, dakbayan sa Sugbo.
Ang suspek giila nga si Harold Domen Yu, alyas Jono, 41, lumad nga taga Purok 2, Barangay Nagasi, La Carlota Negros Occidental, apan kasamtangan nga nagpuyo sa Brgy. Mabolo.
Si Yu nakuhaan og mga binulto nga gituohang shabu nga dunay timbang nga 1,000 grams kun usa ka kilo nga dunay standard drug price (SDP) nga P6.8 milyunes.
Sa nakuha’ng impormasyon sa kapulisan, ang suspek nabilanggo ug nakombikto na niadtong 2011 sa Regional Trial Court (RTC) Branch 30 sa dakbayan sa Dumaguete, Negros Oriental sa kasong ilegal nga drugas.
Si Yu nadala sa New Bilibid Prisons sa Muntinlupa ug nabilanggo sulod sa lima ka tuig.
Nakagawas siya sa prisuhan niadtong 2016 human nakakuha’g probation sa kasong giatubang.
Matod pa nga si Yu sinaligan, runner ug nagsilbing bodegero sa igsuon niini nga napriso karon sa Abuyog Penal Colony sa Abuyog Leyte.
Gipaubos siya sa monitoring human nigawas ang iyang ngalan nga maoy tinubdan sa ilegal nga drugas sa mga nadakpan sa kapulisan atol sa ilang anti-illegal drug operations.
Human sa surveillance, nasuta nga ang suspek mao nay nidumala sa ilegal nga negosyo sa iyang igsuon.
Maka dispose kini og usa ngadto sa duha ka kilo sa ilegal nga drugas kada semana.